2026 jyly shegirtkege qarsy hımııalyq óńdeý kólemi 2,2 mln gektar bolady
ASTANA. KAZINFORM - Qazaqstanda bıyl úıirli shegirtke zııankesterine qarsy hımııalyq óńdeý jumystarynyń boljamdy kólemi 2,2 mln gektardy quraıdy.
QR Aýyl sharýashylyǵy mınıstrligi baspasóz qyzmetiniń habarlaýynsha, bul kórsetkish ótken jylmen salystyrǵanda 500 myń gektarǵa az. Oǵan monıtorıng sapasynyń artýy, zııankester oshaqtaryn ýaqtyly anyqtaý jáne olardy jedel joıý sharalarynyń tıimdiligin arttyrý sharalary oń yqpal etti.
QR Aýyl sharýashylyǵy mınıstrligi Agroónerkásiptik keshen salasyndaǵy memlekettik ınspektsııa komıteti men Túrkistan oblysy ákimdiginiń birlesken jedel shtaby otyrysynda zııankesterge qarsy qorǵaý is-sharalaryn júrgizý jáne shegirtkelerdiń transshekaralyq kóshi-qonynyń aldyn alý máseleleri qaraldy.
Komıtet tóraǵasy Sáken Qanybekovtiń aıtýynsha, bıylǵy maýsymda zertteý ádisterin jańǵyrtýǵa jáne monıtorıngtiń dáldigin arttyrýǵa basa nazar aýdarylady. Osy maqsatta qosymsha 50 dron satyp alynyp, olardyń jalpy sany 57-ge jetkizildi. Barlyǵy 3500 jumyldyrylǵan.
Sonymen qatar hımııalyq óńdeý qyzmetterin ortalyqtandyrylǵan satyp alý júıesi engizilip, tehnıkanyń ónimdilik normalary ońtaılandyryldy jáne qoldanylatyn pestıtsıdterdiń tıimdiligine qoıylatyn talaptar kúsheıtildi.
Eldiń ońtústik óńirlerinde, atap aıtqanda, Túrkistan, Jambyl, Almaty oblystarynda jáne Jetisý oblysynda aýmaqtardy monıtorıngteý jumystary júrip jatyr. Al soltústik jáne batys óńirlerde zertteý jumystary topyraqtyń kebýine qaraı bastalmaq.
Osy jyly sondaı-aq, shekara mańyndaǵy aýmaqtarǵa erekshe kóńil bólinedi. Jalpy óńdeý kóleminiń 1,17 mln gektary Reseı Federatsııasymen shektesetin óńirlerge tıesili. Olar: Atyraý, Batys Qazaqstan, Aqtóbe, Qostanaı, Pavlodar, Shyǵys Qazaqstan jáne Abaı oblystary. Osyǵan baılanysty TMD aıasynda jáne ekijaqty kelisimder sheńberinde Reseı tarapymen tyǵyz ózara is-qımyl jalǵasady.
- Ótken jyly bizdiń qyzmetterdiń úılesimdi jumysynyń nátıjesinde shekara mańyndaǵy 1,26 mln gektar aýmaq zerttelip, zııankesterdiń memlekettik shekara arqyly kóshýine jol berilmedi. Bıyl 17 naýryzda qol qoıylǵan birlesken is-sharalar jospary da fıtosanıtarııalyq qaýipsizdikti qamtamasyz etýge múmkindik beredi, — dedi Sáken Qanybekov.
Túrkistan oblysynda ótken otyrys qorytyndysynda arnaıy tehnıkanyń, pestıtsıd qorlarynyń jáne jedel shtabtardyń qorǵaý is-sharalarynyń belsendi kezeńin bastaýǵa tolyq daıyn ekeni naqtylandy.
Osyǵan deıin shegirtkege qarsy kúreske 100-den astam dron jumyldyrylatyny týraly jazdyq.
