2026 jyly 400-den astam dári-dármek deldaldardyń qatysýynsyz tikeleı satyp alynady - DSM
ASTANA. KAZINFORM – 2026 jyldan bastap jalpy qajettilik 567 mlrd teńgeden asady. «SQ-Farmatsııa» satyp alý naýqany sheńberinde 2000-nan astam dárilik zat pen medıtsınalyq buıymdy satyp alady - bul 2025 jylmen salystyrǵanda 7,2%-ǵa artyq, dep habarlaıdy QR Densaýlyq saqtaý mınıstrliginiń baspasóz qyzmeti.
Baspasóz qyzmetiniń habarlaýynsha, negizgi ózgeristerdiń biri óndirýshilerden tikeleı satyp alý úlesiniń artýy boldy. 2026 jyly 400-den astam dári-dármek deldaldardyń qatysýynsyz tikeleı satyp alynady, bul ótken jyldyń kórsetkishterinen 2,7 ese artyq.
Mundaı dınamıka Densaýlyq saqtaý mınıstriniń №110 buıryǵymen bekitilgen jańartylǵan Qaǵıdalarda bekitilgen satyp alýdyń jańa tetikterin engizýdiń nátıjesi boldy. Negizgi nazar tikeleı óndirýshi zaýyttardan baǵa usynystaryn suraýǵa aýdarylady, bul satyp alý baǵasyn tómendetýge, ashyqtyqty arttyrýǵa jáne qunnyń qalyptasýyn baqylaýdy kúsheıtýge múmkindik beredi.
Satyp alý burynǵydaı halyqaralyq uıymdar – BUUDB, ıÝNISEF jáne STOP TB arqyly júzege asyrylady. Halyqaralyq ınstıtýttar arqyly satyp alynatyn pozıtsııalardyń sany 87%-ǵa (23-ten 43-ke deıin) ulǵaıdy. Mundaı mehanızm básekege qabiletti álemdik baǵalar esebinen aıtarlyqtaı únemdeýdi qamtamasyz etedi, al bosatylǵan qarajat patsıentterdi qosymsha dári-dármekpen qamtamasyz etýge baǵyttalady.
Satyp alynǵan dárilik zattar men medıtsınalyq buıymdardy Biryńǵaı dıstrıbıýtordyń qoımalaryna jetkizý bıylǵy jeltoqsan aıynda josparlanyp otyr. Medıtsınalyq uıymdarǵa jetkizý 2026 jyldyń qańtarynan bastalady.
Dárilik zattardy satyp alý qajettilikti ataýlary, dozalary jáne jetkizý kesteleri boıynsha aıqyndaıtyn medıtsınalyq uıymdardyń ótinimderi negizinde júzege asyrylady. Memlekettik qarajatty jumsaýdyń tıimdiligin arttyrý úshin biryńǵaı dıstrıbıýtor deldaldar tizbegin qospaǵanda, tikeleı satyp alýǵa baǵdarlanýdy kúsheıtedi.
2024 jyly satyp alý erejelerine jańa tetik – baǵa usynystaryn suratýdy bekitetin ózgerister engizildi. Osynyń arqasynda óndirýshiler tikeleı satyp alatyn preparattardyń sany 2025 jylǵy naýqanmen salystyrǵanda 5 eseden astam ósti.
Ashyqtyqty qamtamasyz etý úshin «SQ-Farmatsııa» resmı saıtynda satyp alý týraly ashyq habarlandyrýlar jarııalanady. Sonymen qatar, jetkizýshilermen belsendi kelissózder júrgiziledi: daıyndyq kezeńinde baǵa taldaýy jáne ońtaıly sheshimderdi izdeý júrgiziledi. 2025 jylǵy satyp alý naýqanynyń qorytyndysy boıynsha únemdeý 70 mlrd teńgeden asty.
Biryńǵaı dıstrıbıýtor tikeleı satyp alý úlesin keńeıtýdi jáne óndirýshilermen uzaq merzimdi sharttar júıesine kóshýdi josparlap otyr. Bul baǵanyń turaqtylyǵyn, jetkizilimniń boljamdylyǵyn jáne logıstıkanyń uzaq merzimdi turaqtylyǵyn qamtamasyz etedi.
-Halyqty dári-dármekpen ýaqtyly qamtamasyz etý maqsatynda «SQ-Farmatsııa» 2027 jylǵa arnalǵan satyp alý naýqanyn 2026 jyldyń mamyr aıynda bastaıdy, bul jetkilikti qorlardy qamtamasyz etýge jáne dári-dármekpen qamtamasyz etý júıesiniń turaqtylyǵyn arttyrýǵa múmkindik beredi,-delingen habarlamada.
Osyǵandeıin tirkelmegen dári-dármek ákelýge arnalǵan elektrondy ruqsattyń jańa formasy engizilgeni týraly habarladyq.
Sondaı-aq byltyr eldegi dári-dármek óndirisi – 21,8%-ǵa ulǵaıǵany týraly jazdy.