2026 jyly Prezıdent bastamalaryna 285 mlrd teńge bólinedi
ASTANA. KAZINFORM — 2026 jyly respýblıkalyq bıýdjet kirisi 23,1 trln teńge kóleminde bolady boljanyp otyr. Bul týraly Qarjy vıtse-mınıstri Abzal Beısenbaev málim etti.
— 2026 jyly bıýdjet tapshylyǵy, jalpy ishki ónim 2,5%-ǵa jetedi dep kútilip otyr, al 2028 jylǵa qaraı 0,9%-ǵa deıin tómendeıdi. Qaryzdyq júktemeni qalypty deńgeıde saqtaı otyryp, shyǵysty ońtaılandyrý emes, kiris bazasyn nyǵaıtýǵa umtylamyz. Kiris pen tapshylyqty eskere otyryp, bıýdjettik shyǵys 27,7 trln teńge, bul bıylmen salystyrǵanda 2 trln teńgege artyq. Memlekettik qaryzdy óteýge 3,5 trln teńge josparlanǵan. Shuǵyl shyǵys pen tótenshe jaǵdaıdy joıýǵa arnalǵan memlekettik rezervke shamamen 500 mlrd teńge baǵyttalady, — dedi Abzal Beısenbaev Májilis qabyrǵasynda.
Mınıstr orynbasarynyń málimetine sáıkes, Prezıdent bastamalaryna 285 mlrd teńge bólinedi. Sýbventsııa kólemi — 5,1 trln teńge.
— Basymdyq negizgi mindettemeni tolyq qarjylandyrýǵa beriledi. 2026 jylǵy bıýdjetti Ulttyq qordan maqsatty transfert tartpaı-aq teńgerimdi etýdi kózdep otyrmyz. Jalpy kólemi 36,2 trln teńge bolatyn shyǵystyń ishinde 27,7 trln teńge qoldaý tapty. Bul ákimdiktermen júrgizilgen aýqymdy birlesken jumys nátıjesi, tek mańyzdy ári qajetti baǵyttar irikteldi. Shyǵysty ońtaılandyrý jáne basymdyqtardy qaıta bólý júrgizildi. Bul bazalyq aǵymdyq shyǵysty qysqartýǵa múmkindik berdi, jalpy shyǵystyń úlesi 15%-dan 12,3%-ǵa deıin tómendedi. Ókildik jáne aǵymdaǵy sıpattaǵy shyǵysty ońtaılandyrylyp, naqty sektorǵa qaıta baǵyttaldy, — deıdi ol.
Búgin Májiliste «2026-2028 jyldarǵa arnalǵan respýblıkalyq bıýdjet týraly» jáne respýblıkalyq jáne oblystyq bıýdjet, respýblıkalyq mańyzy bar qalalar, Astana bıýdjeti arasyndaǵy 2026-2028 jyldarǵa arnalǵan jalpy sıpattaǵy transfert kólemi týraly zań jobasy tanystyrylyp jatyr.
Aıta ketsek, 2026 jyly bıýdjet shyǵysy 2 trln teńgege ulǵaıady degen boljam bar.