2026 jyly Ózbekstan ishki jalpy ónim kólemin 150 mlrd dollardan asyrýǵa nıetti
TAShKENT. KAZINFORM – Bıyl 9 aıda Ózbekstannyń ishki jalpy ónim kólemi 7,6 paıyzǵa ósti. Bul týraly prezıdent Shavkat Mırzıeevtiń tóraǵalyǵymen ótken keńeste málim boldy, dep habarlaıdy Kazinform agenttiginiń menshikti tilshisi.
Ózbekstan basshysy atap ótkendeı, qańtar-qyrkúıek aralyǵyndaǵy ekonomıkalyq ilgerileý boljamdy kórsetkishten asyp tústi. Atap aıtqanda, ónerkásip - 6,8%, qurylys - 14,2%, qyzmet kórsetý salasy – 14% jáne aýyl sharýashylyǵy 4,1%-ǵa ósti.
- Eń bastysy – bul ósim birinshi kezekte halyqtyń ál-aýqatyn kóterýge qyzmet etedi, - dep málim etti Shavkat Mırzıeev.
Ol jyl sońyna deıin ishki jalpy ónim kólemin 135 mlrd dollardan asyrý mindeti turǵanyn atap ótti. Sonymen qatar keńeste 2026 jylǵa qoıylǵan josparlar qaraldy.
Atap aıtqanda, kórshiles el keler jyly ishki jalpy ónimniń ósimin 6,6% deńgeıinde qamtamasyz etip, onyń kólemin 150 mlrd dollardan asyrýǵa nıetti. Sondaı-aq, Shavkat Mırzıeev jaýapty vedomstvo basshylaryna ınflıatsııany 7% shamasynda ustap turýǵa baǵyttalǵan sharalardy qabyldaýdy tapsyrdy.
Qosa ketsek, jyl basynan beri Ózbekstan altyn eksportyn 70%-ǵa arttyrdy. Munymen birge bıyl 9 aıda resmı Tashkent Astanadan 2,4 mlrd dollardyń taýaryn ımporttady.
Buǵan deıin habarlaǵanymyzdaı, Ózbekstannyń syrtqy qaryzy 72 mlrd dollardan asty. Sondaı-aq, kórshiles el úkimeti 2030 jylǵa deıin kedeılik deńgeıin eki ese azaıtýǵa nıetti.