2026 jyly óńirlerdiń kirisi 10,7 trln teńgege artady
ASTANA. KAZINFORM — 2028 jyly jergilikti bıýdjetterdiń respýblıkalyq bıýdjetke táýeldiligi ortasha eseppen 57 paıyzdan 33 paıyzǵa deıin tómendeıdi Bul týraly Senattyń Qarjy jáne bıýdjet komıtetinde ótken kezdesýde Ulttyq ekonomıka birinshi vıtse-mınıstri Azamat Ámrın aıtty.
— Boljamǵa sáıkes, óńirlerdiń kirisi 2026 jyly 10,7 trln teńgege, 2028 jyly 13,3 trln teńgege deıin artady nemese ósim 24 paıyz. Jergilikti bıýdjetterdiń aǵymdaǵy shyǵystarynyń boljamdy kólemi ınflıatsııaǵa ındeksteý jáne óńirlerdegi memlekettik qyzmetterdi tutynýshylar sanynyń boljamyn eskere otyryp eseptelindi. Bıýdjet kodeksiniń jańa talaptaryna sáıkes, shyǵystarǵa sholý jasaldy, — dedi ol.
Onyń atap ótýinshe, parametrler boljamyn esepteý barysynda jergilikti atqarýshy organdardyń qaryzdarǵa qyzmet kórsetý jáne óteý shyǵystary, bıýdjet kredıtteri, memlekettik-jekeshelik áriptestik boıynsha memlekettik mindettemeler, ımıdjdik shyǵystar, granttar, zertteýler, konsatıngtik qyzmetter, ǵylymı-tehnıkalyq jobalar men baǵdarlamalar eskerilgen joq.
— Buǵan qosa, jergilikti bıýdjetter bazasyna maqsatty aǵymdaǵy transfertterdi qostyq. 2026 jyly ol 676 mlrd teńge. Agroónerkásip keshenin sýbsıdııalaý, shyǵystary, sýdy únemdeý men tamshylatyp sýarý tehnologııalaryn engizýge arnalǵan qarajat, qaıtadan paıdalanýǵa beriletin nysandardy kútip ustaý shyǵystary, D jáne E sanattary boıynsha mindetti áleýmettik medıtsınalyq saqtandyrý jarnalary, tómengi memlekettik qyzmetshilerdi, Іshki ister mınıstrligi qyzmetkerleriniń jalaqysyn kóterý, probatsııa qyzmetin kútip ustaý, ınjenerlik-kommýnıkatsııalar ınfraqurylym úshin shyǵarylatyn memlekettik qundy qaǵazdar boıynsha jergilikti atqarýshy organdardyń negizgi qaryzdaryn óteý shyǵystary qosymsha eskerildi, - dedi birinshi vıtse-mınıstr.
Onyń atap ótýinshe, 2026 jyly bıýdjettik sýbventsııa 5,1 trln, 2027 jyly 6,4 trln, 2028 jyly 6,8 trln teńge mólsherinde aıqyndaldy. Bıýdjettik alym 2026 jyly — 0,9 trln, 2027 jyly — 1,1 trln, 2028 jyly 1,4 trln teńge.
- Bul rette 2028 jyly Pavlodar oblysy óz-ózine jetkilikti, al Mańǵystaý oblysy qaıtadan donor bolady. Bizdiń baǵalaýymyzsha, jergilikti bıýdjetterdiń respýblıkalyq bıýdjetke táýeldiligi ortasha eseppen 57 paıyzdan 33 paıyzǵa deıin tómendeıdi, — dedi Azamat Ámrın.
Buǵan deıin 2026 jyldan bastap turaqty kiristiń 40 paıyzy jergilikti bıýdjetke jınalatynyn jazǵan edik.