2026 jyly óńdeý ónerkásibi JІÓ ósiminiń draıverine aınalady
ASTANA. KAZINFORM — Úkimette vıtse-premer — ulttyq ekonomıka mınıstri Serik Jumanǵarınniń tóraǵalyǵymen ekonomıkalyq ósýdi qamtamasyz etý jónindegi shtabtyń bıylǵy birinshi otyrysy ótti. Bul týraly ulttyq ekonomıka mınıstrliginiń baspasóz qyzmeti habarlady.
Mınıstrlik málimetinshe, onda 2026 jylǵy ekonomıkalyq damýdyń joǵary qarqynyn qoldaý quraldary negizgi talqylaý taqyrybyna aınaldy.
— 2026 jylǵy negizgi baǵyt — óńdeý ónerkásibin JІÓ-niń ósý kóziniń biri retinde damytý. Vıtse-premerdiń tapsyrmasy boıynsha Ónerkásip jáne qurylys mınıstrligi ár sektorǵa qatysty sharalardy egjeı-tegjeıli pysyqtaı otyryp, óńdeý ónerkásibin damytýdyń jol kartasyn ázirledi. Ekonomıkalyq shtab otyrystarynda salanyń ekonomıkadaǵy júıelik rólin eskere otyryp, saladaǵy árbir bólikti jekeleı, álsiz jaǵy men shekteýlerdi, ósýdegi kedergilerdi taldaı otyryp qaraý týraly sheshim qabyldandy, — delingen vedomstvo taratqan aqparatta.
Problemalardy jáne damý áleýetin keshendi talqylaý úshin ekonomıkalyq shtabtyń jumysyna salalyq qaýymdastyqtar men naryqtaǵy iri qatysýshylar tartylmaq.
Óńdeý ónerkásibiniń shamamen 40%-yn quraıtyn metallýrgııaǵa erekshe nazar aýdarylyp jatyr. 2026 jyly metallýrgııadaǵy naqty kólem ındeksi (NKI) tústi jáne qara metallýrgııany damytý esebinen 103% deńgeıinde boljanyp otyr. Metallýrgııanyń eleýli úlesi saýdada da saqtalyp otyr. Ol — shamamen 5%. Bul óndiristiń naqty kólemin ulǵaıtý esebinen saýda aınalymynyń ósýine qosymsha úles qospaq.
Mashına jasaýda da turaqty ósim boljanyp otyr. Ol 2026 jyly 13,4% bolýy múmkin. Atap aıtqanda, jeńil avtomobıl, júk jáne arnaıy tehnıka, ózdiginen júretin aýyl sharýashylyǵy tehnıkasy, ashyq vagon, temirjol platformasy men turmystyq tehnıka shyǵarýdy ulǵaıtý arqyly júzege asyrylady.
Hımııa ónerkásibinde qoldanystaǵy jáne jańa ınvestıtsııalyq jobalardy júzege asyrý esebinen 7%-ǵa ósim kútiledi.
Qurylys materıalyn óndirýde 6% deńgeıindegi ósimge portlandtsement, keramıkalyq plıtar, temirbeton buıymy men taýarlyq beton óndirisin ulǵaıtý esebinen qol jetkizý josparlanyp otyr.
Qurylys salasy 2025 jyldyń qorytyndysy boıynsha rekordtyq kórsetkishke jetip, 20,1 mln sharshy metr turǵyn úı paıdalanýǵa berildi. Vıtse-premer ÓQM men óńirlerdiń aldyna 2026 jyly da belgilengen qarqyndy saqtaý mindetin qoıdy.
Bıyl saýdadaǵy naqty kólemdi +6,5%-dan kemitpeý maqsaty qoıyldy. Oǵan jetý úshin aınalym men eksportty keńeıtýdiń qurylymdyq faktoryna basa nazar aýdarylady. Bul — AÓK ónimin, onyń ishinde astyqty syrtqy kóterme saýda naryǵyna jetkizýdi ulǵaıtý, el ishindegi azyq-túlik jáne azyq-túlik emes taýar óndirisin ulǵaıtý.
Saýdadaǵy NKI-di ósirýdiń negizgi draıveri retinde uıymdasqan kóterme býyndy damytý qarastyrylyp otyr. Bıyldan bastap óndirýshiler men ishki saýda sýbektileri arasynda tikeleı jetkizýdi qamtamasyz etetin kóterme B2B elektrondyq saýda alańdary tolyq iske qosylady. Otandyq taýardy ótkizý naryǵy keńeıip keledi. Osy jyly baǵa belgileýdiń ashyqtyǵyn arttyrýǵa, artyq deldaldy qysqartýǵa jáne bıznes úshin boljamdy jaǵdaıdy qalyptastyrýǵa baǵyttalǵan kóterme satyp alý standarty engiziledi.
Saýda keńistiginiń keminde 30%-yn qazaqstandyq ónimge mindetti túrde bólýdi kózdeıtin jańartylǵan ishki saýda erejesi otandyq óndirýshi úshin qosymsha yntalandyrý bolmaq. Sondaı-aq, oǵan kóleńkeli taýar aınalymynyń negizgi kózi retindegi naryqtyń qyzmetin lıtsenzııalaý men retke keltirý, jetkizilim tizbegin tsıfrlandyrý men qadaǵalaý sharalary da eleýli úles qosady.
Kólik jáne qoımalaý salasynda da joǵary ósý qarqyny saqtalyp otyr. Birinshi toqsanda 6,1%-ǵa ósý boljanyp otyr. Bul rette 305,3 mln tonna bolatyn (+13,3%) júk tasymaly men 496,6 mln adam quraıtyn (+12,2%) jolaýshy tasymaly birdeı úles qospaq. Jyl qorytyndysy boıynsha saladaǵy ósim +9,6% deńgeıinde bolady dep boljanyp otyr. Bul kórsetkishterge qol jetkizý 11 myń shaqyrym avtojoldy jóndeý, «Qyzyljar-Moıynty» jáne «Darbaza-Maqtaaral» temirjol jelileriniń qurylysyn aıaqtaý, Zaısan, Katonqaraǵaı jáne Kendirli áýejaılaryn iske qosý, temirjol jáne aerovokzaldardy jańǵyrtý, sondaı-aq kólik parkin jańartý esebinen josparlanǵan.
— Otyrys sońynda vıtse-premer óńirlerge bıýdjetti qatań shoǵyrlandyrý júrip jatqan jaǵdaıda ekonomıkanyń negizgi salalary boıynsha ósý qarqynyn tómendetip almaýdy tapsyrdy. Sondaı-aq, jarııalanyp otyrǵan Tsıfrlandyrý jáne jasandy ıntellekt jylynda ekonomıkanyń tıisti sektorynyń ekonomıkalyq damýyna erekshe nazar aýdarylatyny atap ótildi, — delingen habarlamada.
Budan buryn Úkimette vıtse-premer — ulttyq ekonomıka mınıstri Serik Jumanǵarınniń tóraǵalyǵymen jańa maýsymdaǵy kóktemgi dala jumystaryna daıyndyq jóninde osy jylǵy alǵashqy jıyn ótkenin jazǵan edik.