2026 jyly nesıege mal alǵandarǵa da memleketten 85 paıyz kepildik beriledi

ASTANA. KAZINFORM – Aýyl sharýashylyǵy mınıstri Aıdarbek Saparov Úkimet otyrysynan keıin ótip jatqan baspasóz máslıhatynda nesıege mal alaıyn dese, kepildikke qoıatyn aktıvi bolmaı júrgen sharýalarǵa memleket qandaı kómek beretinin aıtty.

- Kepildik berý saıasatyna qatysty másele sheshildi dep aıtýǵa da bolady. «Damý» qory arqyly nesıe somasynyń 85 paıyzyna kepildik beriledi. Keńselerdiń tabaldyryǵyn tozdyryp júrmeý úshin portfeldik kepildendirý jasap qoıdyq. Birden «Agrarlyq nesıe korporatsııasy» ótinim qabyldap, 85 paıyz kepildik beredi. Osy baǵdarlamany mal sharýashylyǵyna da engizbekshimiz, - dedi ol.

Mınıstrdiń sózinshe, osy bastama boıynsha keshendi jospar ázirlenip jatyr.

- Jospardy jyl sońyna deıin aıaqtap, kelesi jyly qoldaýdy bastaımyz Bul aýyl sharýashylyǵyna úlken qoldaý bolaıyn dep tur. Qazir sharýalarǵa jergilikti áleýmettik kásipkerlik korporatsııalar da nesıe beredi. Al olardyń kepildik saıasatyn úılestirý keńesteri aıqyndaıdy, - dedi vedomstvo basshysy.

Eske salsaq, eki aı buryn Premer-mınıstr Oljas Bektenov Aýyl sharýashylyǵy mınıstrligine 2 aı ishinde mal sharýashylyǵyn damytýdyń keshendi josparyn ázirlep, 1 aı ishinde jer resýrstaryn ádil bólýge baǵyttalǵan tıisti zańnamalyq bastamalardy ázirlep, usynýdy tapsyrǵan edi.