2026 jyly «Moıynty — Qyzyljar», «Darbaza — Maqtaaral» temir joldary paıdalanýǵa beriledi

ASTANA. KAZINFORM — 2026 jyly «Moıynty — Qyzyljar», «Darbaza — Maqtaaral» temir joldary paıdalanýǵa beriledi. Bul týraly Úkimet úıinde ótip jatqan baspasóz máslıhatynda Premer-mınıstrdiń birinshi orynbasary Roman Sklıar aıtty. 

— Ónerkásipte jarty jyl ishinde óndiris kólemi 28,9 trln teńge bolyp, 6,5 paıyzǵa ósti. Onyń ishinde óńdeý ónerkásibi 13,7 trln teńgege ónim óndirdi. Bul ótken jylǵy kórsetkishten 5,5 paıyzǵa joǵary. Óńdeýshi sektordyń eldiń jalpy ishki ónimge qosqan úlesi — 12,4 paıyz. Bul ósim mashına jasaý, hımııa ónerkásibi, qurylys materıaldaryn óndirý jáne azyq-túlik ónimderi kórsetkishteriniń artýy esebinen qamtamasyz etildi. Bıyl jalpy quny shamamen 1,5 trln teńge bolatyn 190 jobany iske qosý josparlanǵan. Onyń 196 mlrd teńge somasyna 47 joba iske qosyldy, 3 myńnan astam jýyq jumys orny quryldy, — dedi Úkimet basshysynyń birinshi orynbasary.

Onyń atap ótýinshe, mańyzdy baǵyttardyń biri — kólik ınfraqurylymyn damytý.

— Birqatar iri temirjol jobasy iske asyrylyp jatyr. «Dostyq — Moıynty» jáne «Almaty qalasynyń aınalma joly» jobalary aıaqtalý satysynda. Kelesi jyly «Moıynty — Qyzyljar», «Darbaza — Maqtaaral» jobalary aıaqtalady. Al 2027 jyly «Baqty — Aıagóz» jobasy iske qosylady. Jyl sońyna deıin 175 jańa jolaýshylar vagonyn satyp alý josparlanyp otyr, — dedi Roman Sklıar.

Birinshi vıtse-premerdiń aıtýynsha, áýe habtaryn damytý jáne áýe júkterin óńdeý kólemin arttyrý maqsatynda áýejaı ınfraqurylymy jańǵyrtylýda. Kedendik rásimder jeńildetilip, tsıfrlyq sheshimder engizilip jatyr.

— Zaısan, Katonqaraǵaı jáne Kendirli kýrorttyq aımaqtarynda áýejaı qurylysy bastaldy. Avtokólik joldary salasynda 12 myń shaqyrym jol qurylys jáne jóndeý jumystarymen qamtylǵan. Onyń 7 myń shaqyrymyn osy jyldyń sońyna deıin aıaqtaý josparlanyp otyr, — dedi ol. 

Aıta ketelik Zaısan, Katonqaraǵaı, Kendirli áýejaılaryna qatynaıtyn ushaqtar satyp alynbaq.