2026 jyly memlekettik qyzmetshiler jumysqa tek qana onlaın qabyldanady

ASTANA. KAZINFORM — Kelesi jyldan bastap memlekettik qyzmetshiler jumysqa tek onlaın qabyldanady. «E-Qyzmet» jáne «Biryńǵaı kadr júıesi» portaldary irikteýde ashyqtyqty qamtamasyz etip, adamı faktorǵa jol bermeıdi.

Memlekettik qyzmet isteri agenttiginiń tóraǵasy Darhan Jazyqbaıdyń aıtýynsha, memlekettik qyzmetke onlaın qabyldaý eki jyl buryn pılottyq rejımde bastalǵan.

— Biz 2023 jyly «E-Qyzmet» portalynda memlekettik qyzmetshilerdi jumysqa onlaın qabyldaýdy bastadyq. Endi 2026 jyldan bastap, barlyq tártip pen zańdy ózgerte otyryp, memlekettik qyzmetke tek qana onlaın qabyldaımyz. Bul bizdiń tsıfrlandyrýdaǵy alǵashqy qadamdarymyzdyń biri, — dedi D.Jazyqbaı agenttik tilshisine bergen suhbatynda.

Sondaı-aq, keler jyly «Memlekettik qyzmet týraly» jańa zań jobasy Parlamentke usynylady. Onda irikteý, tsıfrlandyrý, jasandy ıntellektti qoldaný sekildi jańashyldyqtar bolady.

— Qazir «E-Qyzmet» portalynda memlekettik qyzmetshilerdi biliktiligine, bilimine qaraı jasaqtaý boıynsha jasandy ıntellektini engizip jatyrmyz. Olardyń atqaratyn laýazymdaryna, nusqaýlyqtaryna jasandy ıntellektini kirgizip, olardyń qanshalyqty júktemesi baryn anyqtaý jumystaryn joba retinde bastadyq. Munyń bárine 2026 jyly qadam basamyz, — deıdi agenttik tóraǵasy.

Munyń bári jastardy memlekettik qyzmetke qyzyqtyrý úshin jasalyp otyr. Qazirdiń ózinde memlekettik qyzmette 7 myń bos oryn bar. Oǵan qosa 567 adam jeke sektordan kelip, túrli basqarýshy laýazymdarǵa taǵaıyndalǵan.

— Bizdiń maqsatymyz – bilikti, bilimdi mamandardy memlekettik qyzmetke ákelý. Óziniń bilimin, tájirıbesin jáne biliktiligin kórsetetin azamattar elge qyzmet etýi úshin merıtokratııa qaǵıdalaryn engizdik. 2019 jyldan bastap, Prezıdenttik jastar kadrlyq rezervi qalyptasty. Qazir 300-den astam rezervshiler túrli salada jaýapty laýazymdarda qyzmet atqaryp jatyr. Budan basqa óńirlik jastar kadr rezervin qurdyq. Onda da 500-ge jýyq jas bar. Qazir grantpen oqyp jatqan stýdentterge aýdandyq, aýyldyq, oblystyq mańyzy bar qalalarǵa konkýrstan ótpeı, test tapsyrmastan tikeleı jumysqa ornalasýyna múmkindik berdik. Munyń bári adamı resýrstarmen durys jumys isteýdiń úlgisi sanalady, — deıdi D.Jazyqbaı.

Aıta keteıik, Úkimet memlekettik qyzmettiń 90 paıyzy tek elektrondy formatta kórsetilýi qajettigi jóninde qaýly shyǵardy.