Medıtsına qyzmetkerleriniń eńbekaqysy kóteriledi jáne qaýipsizdigi kúsheıtiledi
ASTANA.KAZINFORM - Memleket basshysynyń tapsyrmasy boıynsha Densaýlyq saqtaý mınıstrligi patsıentke baǵdarlanǵan, medıtsınalyq kómektiń qoljetimdiligi men sapasyn arttyrýǵa baǵyttalǵan salany jańǵyrtý jáne damytý jónindegi is-sharalar keshenin júzege asyryp jatyr. Bul týraly Densaýlyq saqtaý birinshi vıtse-mınıstri Tımýr Sultanǵazıev málimdedi, dep habarlady Úkimettiń baspasóz qyzmeti.
Onyń aıtýynsha, Prezıdent tarapynan dáıekti qoldaýdyń arqasynda densaýlyq saqtaý salasyna jumsalatyn memlekettik shyǵyndar sońǵy jyldary úsh esege jýyq ósip, 2025 jyly 3 trln teńgege jetken. Bul medıtsınalyq kómektiń kólemin edáýir keńeıtýge, ınfraqurylymdy aýqymdy túrde jańǵyrtýǵa jáne medıtsınalyq uıymdardyń materıaldyq-tehnıkalyq bazasyn jańartýǵa múmkindik berdi. Máselen, respýblıkalyq mańyzy bar negizgi nysandar paıdalanýǵa berildi. Olar – Ulttyq onkologııa ortalyǵy, Astanadaǵy shuǵyl medıtsına ortalyǵy, sondaı-aq Almatydaǵy Ulttyq juqpaly aýrýlar ortalyǵy.
– Memleket basshysynyń tapsyrmasy boıynsha júzege asyp jatqan aýyldyq densaýlyq saqtaý salasyn jańǵyrtý jónindegi aýqymdy joba aıaqtalýda. Qazirdiń ózinde aýyldyq jerlerde 650-den astam medıtsınalyq nysan paıdalanýǵa berildi, bul qala men aýyl arasyndaǵy alshaqtyqty edáýir azaıtty, — dep atap ótti Tımýr Sultanǵazıev.
Uzaq ýaqyttan beri alǵash ret tarıftik saıasat qaıta qaraldy: bosandyrý jáne pedıatrııa tarıfteri kóterildi, aýrýlardyń aldyn alýǵa, erte dıagnostıkalaýǵa jáne medıtsınalyq qyzmetterdiń sapasyn arttyrýǵa basa nazar aýdaryldy. Klınıkalyq baǵyttarda eleýli progreske qol jetkizildi, ana men balanyń densaýlyǵyn saqtaý júıesi nyǵaıtyldy. Onkologııalyq qyzmet belsendi damyp keledi, buryn negizinen shetelde qol jetimdi bop kelgen joǵary dáldiktegi jáne jumsaq emdeý ádisteri engizilip jatyr.
Dárilik saıasatqa degen jańasha kózqaras dári-dármekpen qamtamasyz etýdiń turaqtylyǵyn arttyryp, bıýdjet qarajatyn aıtarlyqtaı únemdeýge múmkindik berdi.
Memleket basshysynyń Qazaqstan halqyna Joldaýynda belgilep bergen strategııalyq basymdyq retinde tsıfrlandyrýǵa erekshe nazar aýdarylady.
– Salada «eDensaulyq» ekojúıesi qalyptasyp keledi, dárigerdi qoldaý jáne medıtsınalyq kómektiń sapasyn arttyrý quraly retinde jasandy ıntellekt negizindegi sheshimder engizilip jatyr, — dep atap ótti birinshi vıtse-mınıstr.
Sonymen qatar Parlament Memleket basshysynyń tapsyrmasy boıynsha ázirlengen medıtsına qyzmetkerlerin qorǵaý týraly zańnamaǵa engizilgen túzetýlerdi maquldady. Qyzmettik mindetterin atqarý kezinde medıtsına qyzmetkerleri men jedel járdem júrgizýshilerine qatysty jasalǵan zorlyq-zombylyq úshin jeke qylmystyq jaýapkershilik engizilip jatyr, sondaı-aq dárigerlerdiń kásibı jaýapkershiligin saqtandyrý tetigi iske qosyldy. Áleýmettik qoldaý sharalarynyń arqasynda dárigerlerdiń tapshylyǵy 19%-ǵa, orta medıtsınalyq personal 7%-ǵa, aýyldyq jerlerde 16%-ǵa tómendedi.
– 2026 jyldan bastap ınfektsııalyq qyzmetter men jedel medıtsınalyq járdem qyzmetkerleriniń jalaqysyn arttyrý qarastyrylǵan, al dárigerlerge qatysty zorlyq-zombylyq úshin jaýapkershilik kúsheıtiledi. Saqtandyrý modeline kóshýdi, halyqty qamtý kólemin keńeıtýdi jáne medıtsınalyq qyzmetter sapasyn memlekettik baqylaýdy qalpyna keltirýdi kózdeıtin Mindetti áleýmettik medıtsınalyq saqtandyrý júıesin jetildirý jónindegi zań qabyldandy, - dedi Tımýr Sultanǵazıev.
Salany damytýdyń strategııalyq basymdyqtary aıqyndaldy: Densaýlyq saqtaýdy damytýdyń 2029 jylǵa deıingi tujyrymdamasy jáne Medıtsınalyq kómektiń sapasyn basqarýdyń keshendi jospary ázirlendi.
Birinshi vıtse-mınıstr atap ótkendeı, qabyldanyp jatqan sharalar aıtarlyqtaı nátıje bere bastady. Máselen, halyqtyń boljamdy ómir súrý uzaqtyǵy 75,8 jyldy quraıdy, ólim-jitim kórsetkishteri tómendeýde. Jalpy ólim-jitim 2,6%-ǵa, náreste ólimi 18%-ǵa qysqardy, al Qazaqstan halyqaralyq reıtıngterdegi óz pozıtsııasyn jaqsarta otyryp, adam damýy ındeksinde jeti tarmaqqa kóterildi.
Aıta keteıik, endi medıtsına qyzmetkerlerine kúsh qoldanǵandar 12 jylǵa deıin sottalady.