2026 jyly maınıng pen krıpto-bırjadan túsim artady — Kirister komıteti boljamy

ASTANA. KAZINFORM — 2026 jyldan bastap zańnamaǵa ózgerister engizilgennen keıin maınıng pen krıpto-bırjadan keletin túsim kólemi artady dep boljanyp otyr.

Bul týraly Memlekettik kirister komıteti tsıfrlyq aktıvterdi ákimshilendirý basqarmasynyń jetekshisi Talǵat Ádilov málim etti. 

— Túsimniń artýyn boljap otyrmyz, óıtkeni, statıstıkalyq derekterge súıensek, 2024 jyly tsıfrlyq maınıng úshin salyq tóleýshiler sany 52 bolsa, búginde 80-ge jetti, — dedi Talǵat Ádilov komıtette onlaın ótken baspasóz máslıhatynda.

Spıkerdiń aıtýynsha, maınıngtiń rentabeldigi krıptovalıýta qunynyń ósýine baılanysty artqan.

— 2024 jyly óndirilgen bıtkoınnyń quny 38 myń dollar bolsa, búginde ol 120 myńǵa jetti. Osyǵan baılanysty krıpto-aktıvterdi óndirýdiń rentabeldiligi oń kórsetkish kórsetip otyr, óndiris kólemi de ósip jatyr. Ósim artady dep boljap otyrmyz, — deıdi komıtet ókili.

Sondaı-aq maman maınıngten bólek, túsimniń mańyzdy kózi krıpto-bırja ekenin málimdep otyr. 

— Usynylǵan málimetterge sáıkes, maınerlerden bólek tsıfrlyq aktıvter bırjasy bar. Bırjadan málimet alyp, jyl saıyn saýda kóleminiń artqanyn baıqap otyrmyz. Jyl saıyn 2-3 ese ósim baıqalady, — dedi ol.

Osylaısha, Talǵat Ádilovtiń málimdeýinshe, salyq tóleýshiler sanynyń artýy, maınıng tabysynyń ósýi jáne bırjadaǵy belsendilik oń dınamıkany kórsetip otyr. Vedomstvonyń boljamynsha, atalǵan úrdis 2026 jyldan bastap zańnamaǵa engiziletin ózgeristerden keıin de saqtalady.

Eske salsaq, elimizdiń qarjy naryǵynda krıptovalıýta aıyrbastaıtyn oıynshylar paıda bolatyny týraly habarlaǵan edik. 

Buǵan deıin spıker Kirister komıteti tsıfrlyq maınıng naryǵyn qalaı baqylaıtyny týraly aıtyp bergen edi.