2026 jyly MÁMS júıesinde ne ózgeredi
ASTANA.KAZINFORM – 2026 jyly MÁMS júıesinde qosymsha bir mln-nan astam adam qamtylady. Bul týraly QR Densaýlyq saqtaý mınıstrligi MÁMS júıesin jetildirý jáne taldaý departamentiniń dırektory Lázzat Shomanova málim etti.
Aıta keteıik, 2025 jyldyń 14 shildesinde Memleket basshysy mindetti áleýmettik medıtsınalyq saqtandyrý týraly Zańǵa engizilgen ózgeristerge qol qoıdy.
- Zańnyń negizine uzaq merzimdi aktýarlyq modeldi qalyptastyrý kezinde qarjylandyrý modelin qaıta qaraýdy talap etetin demografııalyq jáne ekonomıkalyq faktorlar eskerildi. Bul turǵyda halyqtyń 7 %-ǵa ósýi (2018 jyldan bastap 2025 jylǵa deıin), medıtsınalyq kómekti tutynýshylar sanynyń ulǵaıýy, syrqattanýdyń ósýi sııaqty máseleler qamtyldy, - dedi L.Shomanova Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, medıtsınalyq kómek paketter boıynsha jasandy bólý problemasyn sheshý úshin TMKKK paketinen MÁMS júıesine negizgi mindettemelerdi 2026 jyldan bastap (birinshi kezeń ishinara 2025 jyldan bastalady) aýystyra otyryp, paketterdi kezeń-kezeńmen biriktirý usynyldy. Bul rette:
- saqtandyrý mártebesine qaramastan, eń kóp taralǵan aýrýlar boıynsha bazalyq medıtsınalyq kómekpen qamtamasyz etýge kepildik berýge;
- paketter arasyndaǵy medıtsınalyq qyzmetterdiń qaıtalanýy men aǵynyn boldyrmaýǵa múmkindik beredi. Osylaısha, 2027 jyldan bastap qarjylandyrýdyń basymdyqpen saqtandyrý modeline kóshirý josparlanyp otyr.
Sonymen qatar ol 2026 jylǵy 1 qańtardan bastap MÁMS júıesine jarnalardy esepteý úshin bazanyń joǵarǵy shegin arttyrý eskerilgenin aıtty. Bul turǵyda MÁMS júıesine joǵary jalaqysy bar qyzmetkerlerdiń jarnalary men aýdarymdaryn tóleý boıynsha jeńildikterdiń kúshi joıylmaq. Osy ózgerister barlyq jaldamaly jumysshylar men olardyń jumys berýshileriniń shamamen 9 paıyzyna áser etedi.
- 2027 jyldan bastap MÁMS-ke memleket jarnalarynyń mólsherlemesin birtindep arttyrý eskerilgen. 2015 jyly MÁMS týraly QR Zańynyń birinshi redaktsııasynda belgilengen bastapqy qarjy modeline ishinara qaıta oralýdy bastaımyz... Memleket jarnalaryn kezeń-kezeńmen ósirý nátıjesinde, onyń mólsheri bıylǵy 2%-dan 2037 jylǵa qaraı 4,7%-ǵa deıin ósedi, bul densaýlyq saqtaý júıesine qosymsha 2,8 trln teńge qarajat túsýin qamtamasyz etedi, - dedi departament dırektory.
Ekinshiden, jergilikti bıýdjet qarajaty esebinen jumyssyzdar men qıyn jaǵdaıdaǵy adamdar úshin MÁMS jarnalaryn tóleýdi júzege asyrý jolymen qamtýdy arttyrý qarastyrylǵan. Qaziri shamamen 16,7 mln (82,3 %) adam saqtandyryldy, olardyń 12,1 mıllıony (72,5%) jeńildikti sanattarǵa jatady. 3,3 mln adam MÁMS júıesimen qamtylmaǵan, onyń ishinde 2,4 mıllıony ómir súrý deńgeıi qolaıly jáne qanaǵattanarlyq azamattar. Al 1 mln adam - bul áleýmettik ál-aýqattyń daǵdarystyq (D) jáne tómen (E) deńgeılerine jatady, ıaǵnı tabysy tómen azamattar. Olardyń tabysy otbasynyń negizgi qajettilikterin jabýǵa jetpeıdi. Osy sanat úshin jarnalardy halyqaralyq tájirıbege sáıkes qajetti medıtsınalyq qyzmetterge qol jetkizýdi qamtamasyz ete otyryp, olardyń medıtsınalyq kómekke júginý faktisi boıynsha jergilikti atqarýshy organdarǵa júkteý usynyldy. Sondaı-aq, resmı tirkelgen jumyssyzdar úshin MÁMS jarnalaryn tóleýge shyǵystardy jergilikti bıýdjetterge júkteý usynyldy. Osy sharalardyń arqasynda 2026 jyly MÁMS júıesinde qosymsha bir mln-nan astam adam qamtylady.
Osyǵan deıin Qazaqstanda jumyssyz azamattardyń MÁMS-ke qatysý múmkindigi artatyny týraly jazdyq.