2026 jyly MÁMS derekterin beretin memlekettik organdardyń tizimi jańartylady
ASTANA. KAZINFORM — Úkimet mindetti áleýmettik medıtsınalyq saqtandyrý (MÁMS) júıesine derekter usyný tártibin retteıtin qaýlyǵa ózgerister engizdi. Qujat 2026 jylǵy 1 qańtardan bastap kúshine enedi.
Túzetýler Qazaqstan azamattary men elde ýaqytsha júrgen sheteldikter týraly málimetterdi berýge jaýapty memlekettik organdardyń tizimin naqtylap ári keńeıtedi. Bul rette qujat Eýrazııalyq ekonomıkalyq odaq (EAEO) memleketterinen kelgen eńbek mıgranttary men olardyń otbasy múshelerine de qatysty.
Burynǵydaı barlyq derek «Azamattarǵa arnalǵan úkimet» memlekettik korporatsııasyna joldanyp, odan ári mindetti áleýmettik medıtsınalyq saqtandyrýdyń aqparattyq júıesine beredi.
Sonymen qatar ózgerister «Mindetti áleýmettik medıtsınalyq saqtandyrý týraly» zańnyń 26-babynyń 1-tarmaǵy men 26-1-babynyń 1-tarmaǵyna siltemelerdi naqtylap, tujyrymdamalardy jáne jaýapty organdar tizimin jańartýdy kózdeıdi.
Negizgi jańashyldyqtar:
Qaýlyda derekterdi berý tártibi tek Qazaqstan azamattaryna ǵana emes, sonymen qatar sheteldikter men EAEO elderinen kelgen eńbek mıgranttary jáne olardyń otbasy múshelerine qatysty naqtylanǵan.
1-tarmaqta derekter qujattyń qosymshasynda kórsetilgen barlyq memlekettik organ tarapynan beriletini belgilengen.
Jańa ózgeristerdiń Eńbek jáne halyqty áleýmettik qorǵaý mınıstrligine de qatysy bar. Endi mınıstrlik derekterdi «Eńbek naryǵy», «Zeınetaqy jáne járdemaqy alýshylardyń ortalyqtandyrylǵan derekter bazasy», «Tólemderdi óńdeý uıymy» jáne taldamalyq sheshim «Tsıfrlyq otbasy kartasy» sııaqty túrli aqparattyq júıeler arqyly beredi.
Atap aıtqanda, mınıstrlik kelesi sanattar boıynsha derekterdi usynady:
— tirkelgen jumyssyzdar;
— múgedektigi bar balany tárbıelep otyrǵan, jumys istemeıtin járdemaqy alýshylar;
— I toptaǵy múgedektigi bar adamdarǵa kútim jasaıtyn tulǵalar;
— zeınetkerler men ekinshi dúnıejúzilik soǵys ardagerleri;
— úsh aıdan astam ýaqyt boıy zeınetaqy jarnasyn tólemegen jáne ál-aýqaty daǵdarystyq jaǵdaıdaǵy jumys istemeıtin azamattar.
Odan bólek, tizimge Qazaqstan Respýblıkasynyń Sot ákimshiligi engizildi. Ol derekterdi sot organdarynyń aqparattyq júıesi arqyly jiberedi.
Taıaýda MÁMS júıesine engizilgen ózgerister týraly jazǵan bolatynbyz.
Eske sala keteıik, MÁMS júıesinde sapasyz qyzmet kórsetken mekemeler qarjyny qaıtaratyn boldy.