2026 jyly mal sharýashylyǵyn damytýǵa 300 mlrd teńgeden asa qarjy baǵyttaldy
ASTANA. KAZINFORM — Astanada Veterınarııalyq qyzmet pen mal sharýashylyǵy salasy qyzmetkerleriniń kúnine arnalǵan saltanatty is-shara ótti, dep habarlaıdy Úkimettiń baspasóz qyzmeti.
Úkimet músheleri, Parlament depýtattary, ǵylymı qaýymdastyq ókilderi, fermerler, agrarlyq kásiporyndardyń basshylary jáne elimizdiń barlyq óńirlerinen kelgen salanyń ardagerleri qatysty.
Premer-mınıstr Oljas Bektenovtiń atynan qatysýshylardy Premer-mınıstrdiń orynbasary — ulttyq ekonomıka mınıstri Serik Jumanǵarın quttyqtady.
— Mal sharýashylyǵy — aýyl sharýashylyǵynyń negizgi salalarynyń biri jáne eldiń azyq-túlik qaýipsizdigin qamtamasyz etýde mańyzdy ról atqarady. Memleket basshysynyń tapsyrmasyna sáıkes Úkimet aldaǵy bes jylǵa arnalǵan mal sharýashylyǵy men veterınarııany damytýdyń Keshendi josparlaryn bekitti. Olar salany sapaly jańǵyrtýdyń, onyń tıimdiligi men básekege qabilettiligin arttyrýdyń negizi bolady, — dedi vıtse-premer.
Úkimet qoljetimdi qarjylandyrýǵa erekshe nazar aýdaryp otyr. Tek bıyldyń ózinde mal sharýashylyǵyn jeńildikpen uzaq merzimdi jáne qysqa merzimdi nesıeleý baǵdarlamalaryna 300 mlrd teńge bólindi. Memlekettik qoldaýdyń jańa sharalary óndiris kólemin arttyrýǵa, ónimdilikti kóterýge jáne aýyl sharýashylyǵy taýar óndirýshileri úshin qosymsha múmkindikter jasaýǵa múmkindik beredi.
— Úkimet budan ári de zamanaýı tehnologııalardy engizýge, eksporttyq áleýetti damytýǵa, ótkizý naryqtaryn keńeıtýge jáne aýyl eńbekkerleriniń ál-aýqatyn arttyrýǵa qajetti jaǵdaı jasaı beredi, — dep atap ótti Serik Jumanǵarın.
Aýyl sharýashylyǵy mınıstri Aıdarbek Saparov 2025 jyldyń qorytyndysy boıynsha mal sharýashylyǵynyń jalpy ónim kólemi 3,8 trln teńgege jetip, 3,3%-ǵa óskenin aıtty.
— Bıyl biz eki salanyń mamandaryn birge qurmettep otyrmyz, bul — sımvoldyq mánge ıe. Sebebi qazirgi mal sharýashylyǵy men myqty veterınarııalyq qyzmet bir-birinen ajyramaıdy. Sizder birge Qazaqstan ekonomıkasynyń eń mańyzdy salalarynyń birin qalyptastyryp otyrsyzdar. 2025 jyldyń qorytyndysy boıynsha mal sharýashylyǵynyń jalpy ónim kólemi 3,8 trln teńgege jetip, 3,3%-ǵa ósti. 2026–2030 jyldarǵa arnalǵan mal sharýashylyǵyn damytý jónindegi keshendi jospar salany sapaly jańǵyrtýdy, óndiris kólemin arttyrýdy jáne memlekettik qoldaýdyń tıimdiligin kóterýdi kózdeıdi. Bıyl bul salaǵa 300 mlrd teńgeden astam qarajat baǵyttaldy, — dedi aýyl sharýashylyǵy mınıstri.
Mal sharýashylyǵyn damytý jónindegi keshendi jospardy iske asyrý aıasynda asyl tuqymdy mal satyp alýǵa, aınalym qarajatyn tolyqtyrýǵa jáne jaıylym ınfraqurylymyn damytýǵa baǵyttalǵan «Igilik», «Bereke» jáne «Jaılaý» atty jańa jeńildetilgen nesıelik ónimder iske qosyldy.
Ónimdilikti arttyrý maqsatynda zamanaýı kóbeıtý tehnologııalaryn qoldaýǵa baǵyttalǵan memlekettik qoldaý sharalary kúsheıtilip, asyl tuqymdy mal sharýashylyǵyn damytýǵa yntalandyrýlar engizilip jatyr.
Veterınarııany damytý jónindegi 2026–2030 jyldarǵa arnalǵan keshendi jospar aıasynda veterınarııalyq ınfraqurylym nysandaryn salý jáne jańǵyrtýǵa, zerthanalardy zamanaýı jabdyqtarmen qamtamasyz etýge, arnaıy kólikterdi jańartýǵa jáne materıaldyq-tehnıkalyq bazany nyǵaıtýǵa 66 mlrd teńge qarastyrylǵan. Sondaı-aq salalyq mamandardyń jalaqysyn arttyrýǵa jáne kadrlyq áleýetti damytýǵa 22 mlrd teńge baǵyttalady.
Saltanatty rásim memlekettik jáne vedomstvolyq marapattardy tabystaýmen aıaqtaldy.
Budan buryn Serik Jumanǵarın amerıkalyq bıznes úshin perspektıvaly salalardy atady.
