2026 jyly qosymsha 1 mln-nan astam adam MÁMS júıesimen qamtylady

ASTANA. KAZINFORM – MÁMS-ke qatysty jergilikti atqarýshy organdardyń jaýapkershiligi artady. Bul týraly Parlament Májilisiniń jalpy otyrysynda «QR keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasyn talqylaý kezinde Densaýlyq saqtaý mınıstri Aqmaral Álnazarova málim etti.

- Memleket basshysy 2024 jylǵy 2 qyrkúıektegi Qazaqstan halqyna Joldaýynda memlekettiń múmkindigi men mindettemelerin eskere otyryp, «medıtsınalyq kómektiń Biryńǵaı bazalyq paketin» qalyptastyrýdy tapsyrdy. Al odan ózge shyǵynnyń bári saqtandyrý júıesi arqyly tólenýge tıis. Bul rette, jergilikti atqarýshy organdardyń jaýapkershiligin arttyrǵan jón. Áleýmettik jaǵynan osal toptaǵy keıbir adamdar úshin medıtsınalyq saqtandyrý júıesine aýdarylatyn tólemder jergilikti bıýdjet esebinen tólenýi tıis, - dedi A. Álnazarova.

2027 jyldan bastap qarjylandyrýdyń saqtandyrý úlgisine kóshý úshin osy zań jobasynyń aıasynda mynalar kózdelgen:

1. Medıtsınalyq qyzmetterdiń biryńǵaı bazalyq paketiniń engizilýi áleýmettik mańyzy bar aýrýlardy erte anyqtaý bóliginde memlekettik kepildikterdi keńeıtýge jáne medıtsınalyq kómek paketteriniń túsinikti bolýyn qamatamasyz etýge, paketter arasyndaǵy medıtsınalyq qyzmetterdiń bir-birine kóshýin boldyrmaýǵa, sondaı-aq azamattardyń MÁMS júıesine tolyqqandy qatysýy úshin yntalandyrýlarýǵa múmkindik beredi.
2. Júıeniń qarjylyq turaqtylyǵyn qamtamasyz etý úshin (2026 jyldyń 1 qańtarynan bastap) MÁMS júıesine jarnalardy esepteý bazasynyń joǵarǵy shegin (10-nan 50 ETJ-ǵa deıin) arttyrý usynylady. Bul ózgerister barlyq jaldamaly qyzmetkerler men olarǵa jumys berýshilerdiń shamamen 9 paıyzyna nemese 508 myńǵa jýyq adamǵa áser etedi. 
   Álemdik tájirıbede tabys deńgeıi boıynsha shekteý esh jerde qoldanylmaıdy. Nátıjesinde, MÁMS jarnalarynyń mólsherlemelerin regressıvti salyq salýdan biryńǵaı shkalaǵa kóshirilmek.
3. 2024 jyldyń 7 aqpanynda Memleket basshysy jergilikti atqarýshy organdardyń jaýapkershiligin arttyrýdy jáne áleýmettik jaǵynan osal toptaǵy keıbir azamattar úshin medıtsınalyq saqtandyrý júıesine aýdarylatyn tólemderdi jergilikti bıýdjetten bólýdi tapsyrdy. Jergilikti atqarýshy organdardyń jumyssyzdyq deńgeıin tómendetý jáne halyqty jumyspen qamtýǵa járdemdesý úshin tikeleı jaýapkershiligin eskere otyryp, resmı tirkelgen jumyssyzdar úshin MÁMS-ke jarnalardy tóleý shyǵyndaryn jergilikti bıýdjetterge júkteý kózdelgen. 

- Osy arqyly zań jobasynda jergilikti bıýdjet qarajaty esebinen jumyssyzdar men halyqtyń osal toby sanatyndaǵy adamdar úshin MÁMS jarnalaryn tóleý eskerilgen. Osy sharalardyń esebinen 2026 jyly MÁMS júıesimen qosymsha bir mıllıonnan astam adam qamtylyp, josparly medıtsınalyq kómekke qol jetkizýge múmkindik berip, ulttyń jalpy densaýlyǵy men ál-aýqatyn arttyrady. Bul mehenızm jarnalardyń túsýine qaramastan Qordyń tarapynan «D» jáne «E» sanattaryndaǵy adamdarǵa aı saıyn saqtandyrylǵan mártebesi beriledi. Osy adamdar úshin ákimdikterdiń tólemi medıtsınalyq kómekke júgingen sátten bastap jáne jyl aıaǵyna deıin júzege asyrylady. Atalǵan sanattaǵy adamdardy anyqtaý, saqtandyrylǵan mártebesin berý jáne saqtandyrý jarnalaryn tóleý mehanızmi pysyqtaldy, - dedi mınıstr.

Buǵan deıin MÁMS júıesinen tys qalǵan 3,3 mln adamnyń máselesi qalaı sheshiletinin jazǵan edik.