2026 jyly Qazaqstannyń 11 eskertkishin ıÝNESKO tizimine engizý josparlanyp otyr
ASTANA. KAZINFORM — Mádenıet jáne aqparat mınıstri Aıda Balaeva tarıhı-mádenı muralardy saqtaýǵa jergilikti bılik qulyq tanytpaı otyrǵanyn synǵa aldy.
— Biz óz tarapymyzdan jergilikti ákimdikterge birneshe ret hat joldap, tarıhı-mádenı muralarymyzdy saqtaýǵa qatysty usynystarymyzdy jiberdik. Alaıda keıbir jergilikti atqarýshy organdar bul máselege jiti nazar aýdarmaı otyr. Osy oraıda, mınıstrlik júıeli sharalardy qamtıtyn 3 baǵyttaǵy jospar jobasyn jasap, memlekettik organdarmen kelisip, Úkimet qaraýyna usynýǵa daıyn, — dedi Mádenıet mınıstri Úkimettiń búgingi otyrysynda.
Bul jospar jergilikti ári halyqaralyq deńgeıde ártúrli jumystardy uıymdastyrýǵa negizdelgen. Ondaǵy birinshi baǵyt — ıÝNESKO qorǵaýyndaǵy eskertkishtermen keshendi jumys júrgizý. Bul baǵytta basym máseleler qataryna ıÝNESKO standarttaryn saqtaý, qorǵalatyn jáne zamanaýı býferlik aımaqtardy monıtorıngileý tehnologııalaryn engizý, Búkilálemdik mura tizimindegi 3 nomınatsııany (10 eskertkish) basqarýdyń menedjment-josparyn ázirleý bar.
— Prezıdent tapsyrmasyna sáıkes, 2025 jyldyń qańtarynda ıÝNESKO qaraýyna eki nomınatsııalyq qujat joldandy. Olar — «Mańǵystaý jerasty meshitteri» jáne Qyrǵyzstan, Tájikstan, Ózbekstanmen birlesip daıyndalǵan «Jibek joly. Ferǵana-Syrdarııa dálizi» transulttyq nomınatsııasy. Halyqaralyq reglamentterdi eskere otyryp, 2026 jyly ıÝNESKO tizimine 11 jańa qazaqstandyq eskertkishti engizý maqsatynda tıisti jumystar júrip jatyr, — dedi A. Balaeva.
Jaqynda ǵana «Betashar» rásiminiń mádenı mańyzdylyǵy halyqaralyq deńgeıde tanyldy. Taıaýda «Salbýryn» men «Alpamys batyr» nomınatsııalary boıynsha qujattar ázirlenip, ıÝNESKO qaraýyna usynyldy.
Oǵan qosa, Qyzylordadaǵy 3 tarıhı-mádenı nysan ıÝNESKO tizimine enýi múmkin.
Buǵan deıin Mádenıet mınıstri Qoja Ahmet ıAsaýı kesenesi mańynda kelisilmegen qurylys toqtamaı turǵanyn aıtqan edi.
Sonymen birge, mınıstr Djeı Lo kontsertine qýana-qýana baratynyn, sheteldik juldyzdar kontsertterin uıymdastyratyn kásipkerlerge barynsha qoldaý kórsetiletinin aıtty.