2026 jyly Qazaqstanda qansha azamat áskerge barady

ASTANA. KAZINFORM – Prezıdenttiń áskerı qyzmetshilerdi zapasqa bosatý jáne azamattardy kezekti merzimdi áskerı qyzmetke shaqyrý týraly Jarlyǵyn iske asyrý maqsatynda Úkimet qaýlysy qabyldandy.

Qujatqa sáıkes, 2026 jylǵy naýryz - maýsym jáne qyrkúıek - jeltoqsan aılarynda 18–27 jas aralyǵyndaǵy, keıinge qaldyrýǵa nemese áskerge shaqyrýdan bosatylýǵa quqyǵy joq 43 231 er azamat merzimdi áskerı qyzmetke shaqyrylady.

Oblystardyń, Astana, Almaty jáne Shymkent qalalarynyń ákimderine shaqyrý komıssııalarynyń jumysyn uıymdastyrý, sondaı-aq áskerge shaqyrý naýqanyn belgilengen merzimde ótkizý tapsyryldy. Sonymen birge shaqyrý pýnktterin zańnama talaptaryna saı medıtsınalyq qyzmetpen qamtamasyz etý mindetteldi.

Іshki ister mınıstrligine áskerge shaqyrylýshylardy jınaý jáne áskerge attandyrý oryndarynda qoǵamdyq tártipti kúsheıtý júkteldi.

Kólik mınıstrligi Qorǵanys mınıstrliginiń ótinimderi negizinde merzimdi áskerı qyzmetke shaqyrylǵan azamattar men zapasqa bosatylǵan áskerı qyzmetshilerdi Qarýly Kúshterge, Іshki ister mınıstrligine, Tótenshe jaǵdaılar mınıstrligine, Ulttyq qaýipsizdik komıtetine jáne Memlekettik kúzet qyzmetine jetkizýdi uıymdastyrady.

Sondaı-aq Qorǵanys, Іshki ister jáne Tótenshe jaǵdaılar mınıstrlikterine tasymaldaý qyzmetin kórsetken uıymdardyń shyǵyndaryn respýblıkalyq bıýdjette kózdelgen qarajat sheginde óteý tapsyryldy.

Qaýly 20 naýryzdan bastap kúshine endi.

Eske sala keteıik, buǵan deıin áskerge shaqyrý naýqany kezinde jastarǵa myarmy.kz platformasy arqyly merzimdi qyzmetke onlaın ótinim tapsyrý múmkindigi berilgenin jazǵan edik.