2026 jyly Qazaqstanda 500 tósektik 30 beıindi bólimshe ashý josparlanyp otyr
ASTANA. KAZINFORM – Densaýlyq saqtaý mınıstrligi óńirlerde beıindi medıtsınalyq kómekti jańartý men keńeıtýdiń aýqymdy baǵdarlamasyn iske asyryp jatyr. Jergilikti jerlerde mamandandyrylǵan medıtsınalyq kómektiń qoljetimdiligi úshin 2026-2028 jyldar aralyǵynda elimizdiń 17 óńirinde eresekter men balalarǵa arnalǵan 49 jańa beıindik bólimshe ashý josparlanǵan.
Baǵdarlamanyń sheńberinde revmatologııa, pýlmonologııa, gastroenterologııa jáne gematologııa salalary boıynsha 800-ge jýyq jańa tósek qurylady. Bul erte dıagnoz qoıýǵa, emdeýdi ýaqtyly bastaýǵa jáne sozylmaly jáne aýyr aýrýlary bar patsıentterde asqyný qaýpin azaıtýǵa múmkindik beredi.
2026 jyly 500 tósektik 30-ǵa jýyq beıindi bólimshe ashý josparlanyp otyr. Asa qajettiligi bar óńirlerge – Ulytaý jáne Almaty oblystaryna, sondaı-aq Qyzylorda, Qostanaı jáne Jetisý oblystaryna basymdyq berildi. Qazirdiń ózinde jańa bólimsheler paıdalanýǵa berildi:
• revmatologııa – Aqtóbe oblysynda,
• pýlmonologııa jáne gastroenterologııa – Pavlodar oblysynda,
• pýlmonologııa – Ulytaý oblysynda,
• gematologııa – Jambyl oblysynda.
Tek qańtar aıynda jańa bólimshelerde 200 patsıent medıtsınalyq kómek aldy. Bul óńirlerdiń turǵyndary úshin bul naqty jáne eleýli ózgeristerdi bildiredi: qosymsha tósekter, beıindi mamandarǵa qoljetimdilik jáne emdeýdi kútý merzimin qysqartý. Kelesi aıda elimizdiń bes óńirinde taǵy 200-ge jýyq tósek ashý josparda tur.
Beıindi bólimsheler jelisin damytý jónindegi jumys 2027 jyly da jalǵasady. Endokrınologııa, pýlmonologııa, gastroenterologııa jáne nefrologııa sııaqty eresekter beıini boıynsha taǵy jeti bólimshe ashý josparǵa engizilgen.
Baǵdarlamanyń jeke basymdyǵy – balalardyń densaýlyǵyn saqtaý. Jańartý sheńberinde 224 tósekke arnalǵan 12 balalar beıindi bólimshesin ashý kózdelgen, onyń 102-si paıdalanýǵa berildi. Negizgi baǵyttar – pýlmonologııa, allergologııa, Lor-kómek, pallıatıvtik kómek jáne basqalar.
Bul sharalardy iske asyrý medıtsınalyq kómektiń sapasyn arttyrýǵa, kútý merzimin qysqartýǵa, emdeý nátıjelerin jaqsartýǵa jáne azamattardyń densaýlyq saqtaý júıesine degen senimin nyǵaıtýǵa baǵyttalǵan.
Buǵan deıin habarlaǵanymyzdaı, elordada 11 medıtsınalyq mekeme salynady.