2026 jyly Qazaqstan QazTech bazasyndaǵy tsıfrlandyrýdyń platformalyq modeline kóshedi
ASTANA. KAZINFORM – Memlekettik organdar men kvazımemlekettik sektor uıymdarynyń QazTech elektrondyq úkimetiniń ulttyq aqparattyq-kommýnıkatsııalyq platformasyna mindetti túrde kóshýi kerek.
Bul týraly Memleket basshysy Qasym-Jomart Toqaevtyń tsıfrlandyrýdyń platformalyq modeline kóshý týraly Jarlyǵyn júzege asyrý sheńberinde Qazaqstan Respýblıkasy Úkimetinde Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıevtiń tóraǵalyǵymen ótken jıynda málim boldy, dep habarlaıdy Úkimettiń baspasóz qyzmeti.
Jıynǵa ortalyq memlekettik organdardyń, jergilikti atqarýshy organdardyń, sondaı-aq ulttyq holdıng pen kompanııa ókilderi qatysty.
Kezdesý barysynda 2026 jyldyń basynan bastap QazTech platformasynan tys jańa aqparattyq júıelerdi qurýǵa moratorıı engiziletini atap ótildi.
Tsıfrlandyrýdy damytý bir-biriniń qyzmetterin qaıtalamaı, tıimsiz bıýdjettik shyǵynsyz, biryńǵaı arhıtektýra sheńberinde júzege asyrylady.
Platformalyq modelge kóshý memlekettik tsıfrlyq servıster men derekterdi shoǵyrlandyrýǵa, artyq aqparattyq júıeler sanyn qysqartýǵa, sondaı-aq tsıfrlyq sheshimder aýqymdylyǵyn, qaýipsizdigi jáne tehnologııalyq úılesimdiligin qamtamasyz etýge múmkindik beredi.
Kezdesý qorytyndysy boıynsha barlyq vedomstvolyq aqparattyq júıelerdiń QazTech platformasyna kóshý merzimi anyqtaldy, júıelerdi kóshirýdi aıaqtaý 30 qyrkúıekke deıin josparlanǵan.
- Bizdiń mindetimiz – tsıfrlyq sheshimder bytyrańqy jobalar emes, júıe retinde jumys isteıtin memlekettiń ornyqty, biryńǵaı jáne tıimdi tsıfrlyq platformasyn qurý, — dep atap ótti Jaslan Mádıev.
Osyǵan deıin tsıfrlyq transformatsııa kartalary bir aıda aıaqtalýy tıis ekeni týraly jazdyq.