2026 jyly Qazaqstan men Ázerbaıjan arasynda alǵashqy paromdar qatynaıdy
ASTANA. KAZINFORM – Grýzııalyq kompanııa Qazaqstan men Ázerbaıjan arasynda 6 paromdy iske qosýdy josparlap otyr. Alǵashqy 2 parom keler jyly iske qosylady. Bul týraly óńir ákimi Nurdáýlet Qılybaı aıtyp berdi.
Ákimniń sózinshe, joba Qazaqstannyń otandyq parom parkin qalyptastyrýǵa, júk aınalymyn arttyrýǵa, keme qatynasynyń damýyna yqpal etpek.
– Sonymen birge, kelesi jyly grýzııalyq bıznespen birlesip, Quryq pen Alıat (Ázerbaıjan) porttary arasynda 6 paromdy iske qosýdy josparlap otyrmyz. Qazirgi tańda eki parom Kaspıı teńiziniń akvatorııasyna kirdi. Olar 2026 jyldyń birinshi jartyjyldyǵynda júre bastaıdy. Jyl saıyn taǵy 2 paromnan qosylyp, 2028 jylǵa deıin 6 parom tolyqqandy jumys isteıdi, - dedi N. Qılybaı elordada Ortalyq kommýnıkatsııalar qyzmetinde.
Sonymen birge, bıyl Mańǵystaý oblysy Transkaspıı halyqaralyq kólik baǵdary arqyly bıyl júk tasymalynyń kólemi 20%-ǵa artyp, 2,5 mln tonnany qurady. «Semurg Invest» kompanııasy 2027 jylǵa deıin flotty 6 kemege deıin keńeıtýdi josparlap otyr. Bıyl 7 myń tonnalyq bir keme teńizge shyǵaryldy.
2026 jyly oblysta Jańa teńiz portynyń qurylysy bastalady. Bul baǵytta Memleket Basshysy men Úkimettiń ınvestorlardy tartý boıynsha tapsyrmasy aıasynda bir jyl boıy kelissózder júrgizilgen.
– Qazir ınvestıtsııalyq kelisimder aıaqtalý satysynda tur. Jyl aıaǵynda nemese keler jyldyń basynda qol qoıylyp, 2026 jyldyń 2 toqsanynda qurylys jumystary bastalady. Qazir jer ýchaskesi anyqtalyp, rásimdeý jumystary júrgizilip jatyr. Joba «Qytaı - Qazaqstan - Aqtaý - Baký - Potı - Eýropa» jańa halyqaralyq kólik dáliziniń qalyptasýyna yqpal etedi, - dedi N. Qılybaı.
Buǵan deıin N. Qılybaı Mańǵystaýda ósirilgen aqserke balyǵy ımporttyń 60%-yn almastyratynyn aıtqan edi.