2026 jyly qandaı ózgerister bolady – nýmerolog boljamy
ASTANA. KAZINFORM – Jyl sanaýy boıynsha 2026 jyl Jylqy jyly sanalady. Bul jyl qandaı bolmaq, qoǵam men adam ómirinde qandaı ózgerister boljanady? Osy jóninde nýmerolog Quralaı Baqyt óz boljamyn aıtty.
Nýmerologtiń túsindirýinshe, 2026 jyldyń sany – 1, al bul jańa bastama men qozǵalystyń sımvoly sanalady.
– 1 sany – jańa joldyń belgisi. 2026 jyly adamdar táýekelge jıi baryp, tez sheshim qabyldaıdy. Bul jyldy shartty túrde ǵalymdar, sport jáne IT jyly dep ataýǵa bolady. Sebebi avtomattandyrý, jasandy ıntellekti men logıkaǵa negizdelgen salalar qarqyndy damıdy, – deıdi Quralaı Baqyt Jibek Joly telearnasynyń «Bugin LIVE» baǵdarlamasynda.
Mamannyń aıtýynsha, jyldyń stıhııasy – ot, al ol jyldamdyq pen úlken ózgeristerdi bildiredi. Osy sebepti aldaǵy jyly álemde de, Qazaqstanda da úderister óte qarqyndy órbimek. 2025 jyly shyǵarmashylyq pen shoý-bıznes belsendi bolsa, 2026 jyly sport pen densaýlyq aldyńǵy orynǵa shyǵady.
– Kóp adam tamaqtanýǵa, sportqa, jalpy densaýlyǵyna kóbirek kóńil bóle bastaıdy. Bul – jyldyń eń úlken artyqshylyǵy, – deıdi nýmerolog.
Sondaı-aq ol 2026 jyldyń ekinshi jartysy otbasyn qurýǵa qolaıly ekenin atap ótti. Al jyldyń alǵashqy aılarynda asyǵys sheshim qabyldamaýǵa keńes beredi. Boıdaqtar úshin bul jyl jeke ómirde oń ózgerister ákelýi múmkin.
Aılarǵa toqtalsaq, qańtar men aqpan – medıtsınalyq tekserýlerden ótýge qolaıly kezeń. Naýryz, sáýir jáne tamyz aılary baspana alýǵa yńǵaıly. Mamyr aıynda bilim men oqýǵa ınvestıtsııa salǵan durys.
Nýmerolog jyl sandaryna qaraı da boljam usyndy. Onyń aıtýynsha:
- 6 jáne 7-men aıaqtalatyn jyldary týǵandar úshin mahabbat, otbasy jáne mansap úılesim tabady;
- 2 men 3-ke aıaqtalatyndar úshin tabysty, iri satyp alýlarǵa qolaıly jyl;
- 0 men 1-ge aıaqtalatyndar úshin rýhanı izdenis kezeńi, densaýlyqqa mán berý qajet;
- 4 pen 5-ke aıaqtalatyndar úshin qozǵalys pen saparlar kóbeıedi;
- 8 ben 9-ǵa aıaqtalatyndar úshin 2026 jyl – jańa bastamalardyń jyly.
Sondaı-aq maman jyldyń túsi ot stıhııasyna saı qyzyl ekenin atap ótti.
Nýmerologtiń boljamynsha, 2026 jyldyń ekinshi jartysy Qazaqstan ekonomıkasy úshin de qolaıly kezeń bolmaq.
Aıta keteıik, buǵan deıin 2026 jylǵa juldyzshylar boljamyn jarııalaǵan edik.