2026 jyly ınflıatsııa 12 paıyzǵa barýy múmkin – Azamat Ámrın

ASTANA. KAZINFORM – Ulttyq ekonomıka mınıstriniń birinshi orynbasary Azamat Ámrın qosylǵan qun salyǵynyń mólsherlemesin 12 paıyzdan 16 paıyzǵa kóterý ınflıatsııaǵa qalaı áser etetinin aıtty.

- Bul sharalar qazirgi áleýmettik-ekonomıkalyq damý boljamyndaǵy ınflıatsııa boljamyna qosymsha 2,5-3 paıyz ústeýi múmkin dep otyrmyz. Sonda byltyr ınflıatsııa deńgeıi 8,6 paıyz bolsa, soǵan 2,5 paıyz qossaq, 2026 jyly ınflıatsııa shamamen 12 paıyz ósim bolady. Biraq bul ınflıatsııa da qysqa merzimdi bolady. ıAǵnı, bir jyl kóleminde saqtalady. Al 2027, 2028 jyldary qalpyna qaıtyp keledi. Bul boljamdy esepteýdiń barsha modelderi rastady, - dedi -vıtse-mınıstr.

Sondaı-aq, ol usynylǵan túzetýlerdiń bárin óńir-óńirde 2,5 myńnan astam kásipkermen talqylap kelgenderin eske saldy.

- Reforma jasardyń aldynda búkil óńirlerge baryp qaıttyq. Bıznes qaýymdastyqpen talqylaý jumystaryna 6 jumys toby atsalysqanyn bilesizder. Osy jumys aıasynda 2,5 myńnan astam jeke kásipkermen jáne jeke sharýashylyq basshylarymen kezdestik. Olardyń búkil usynystaryn tyńdap, jazyp aldyq. Qazir sol usynystardy talqylaý júrip jatyr. Májilistiń osy máselege baılanysty qurylǵan jumys tobynda da osy máselelerdi tereń pysyqtaımyz dep oılaımyn, - dedi Azamat Ámrın. 

Eske salsaq, 20 aqpanda Májiliske Salyq kodeksiniń túzetilgen jobasy engizilgen edi. Búgin sol qujatty pysyqtaıtyn Májilistiń jumys toby iske kiristi.

Kodekstiń jańa redaktsııasyndaǵy negizgi túzetýler mynalar:

➤ Qosylǵan qun salyǵy boıynsha mindetti tirkeý shegin tómendetý – 20 000 AEK (78,6 mln teńge) 3 800 AEK (15 mln teńge) deıin; 
➤ Qosylǵan qun salyǵynyń mólsherlemesin arttyrý – 12%-dan 16%-ǵa deıin, buǵan qosa birqatar salalar úshin tómendetilgen mólsherleme 10% belgilenedi;
➤ Jeńildetilgen deklaratsııa boıynsha arnaıy salyq rejımin qoldanýdy shekteý – tek B2C segmentine (bıznes túpkilikti tutynýshylar úshin) qoljetimdi bolady.