2026 jyly ınflıatsııa 10-12% deńgeıinde bolady — ekonomıst

ALMATY. KAZINFORM — Ekonomıst Aıdarhan Qusaıynov 2026 jyly Qazaqstan ekonomıkasynyń qalaı damıtyny jóninde boljam jasady.

Ekonomıstiń pikirinshe, 2026 jyly eldegi ınflıatsııa 10-12% deńgeıinde saqtalady. Al bazalyq mólsherlemege kelsek, Aıdarhan Qusaıynov ony tómendetpeı, kerisinshe kóterý kerek dep esepteıdi.

— Bazalyq mólsherlemeniń tómendeýi ekitalaı. Mundaı sheshim qabyldansa, bul tek saıası sebepterge baılanysty bolýy múmkin. Alaıda bul ekonomıka úshin tıimdi emes. Kerisinshe, mólsherleme qazirdiń ózinde joǵary bolýy tıis ári ony arttyra berý kerek, — dedi sarapshy.

Qusaıynov teńge baǵamyna qatysty naqty boljam jasaý qıyn ekenin, kóp nárse saıası sheshimderge baılanysty bolatynyn aıtty. Tehnıkalyq turǵydan alǵanda, teńge baǵamyn, mysaly, Ulttyq qordan transfertter bólý arqyly ustap turýǵa bolady, buǵan resýrs jetkilikti. Alaıda mundaı qadam ishki ekonomıkalyq teńgerimsizdikti odan ári kúsheıtedi.

Sonymen qatar ol kelesi jyly ekonomıkalyq ósim qarqyny baıaýlaıtynyn boljady. Buǵan Ulttyq qordan bólinetin transfertterdiń qysqarýy negizgi sebep bolmaq.

— Kelesi jyly ekonomıkalyq ósim baıaýlaıdy dep oılaımyn. Sebebi bıýdjetke Ulttyq qordan bólinetin qarajat azaıady. Bıýdjetti toltyrý munaı kiristeri esebinen emes, qaıta bólý tetigi arqyly júzege asady, ıaǵnı bıznes pen halyqqa túsetin salyqtyq júkteme artady. Sonyń saldarynan fıskaldyq yntalandyrý tómendep, ekonomıka baıaýlaıdy, — dedi Aıdarhan Qusaıynov.

Eske salaıyq, buǵan deıin Ulttyq bank tóraǵasy Tımýr Súleımenov Úkimettiń ákimshilik sharalary qarasha aıynda jyldyq ınflıatsııanyń tómendeýine áser etkenin aıtqan edi.