2026 jyly energokeshendi tsıfrlandyrý boıynsha qandaı jumystar atqarylady
ASTANA. KAZINFORM – Memleket basshysy 2026 jyldy Tsıfrlandyrý jáne jasandy ıntellekt jyly dep jarııalady. Energetıka mınıstrligi otyn-energetıka kesheniniń negizgi protsesterine jasandy ıntellekt tehnologııalaryn júıeli túrde engizip keledi.
Mınıstrliktiń tásili eksperımenttik ázirlemelerge emes, ınfraqurylymnyń senimdiligin arttyrýǵa, apattylyqty tómendetýge jáne shyǵyndardy ońtaılandyrýǵa baǵyttalǵan qoldanbaly pılottyq jobalardy iske asyrýǵa negizdelgen.
Qazirgi ýaqytta salada úsh negizgi praktıkalyq keıs júzege asýda:
- Ushqyshsyz ushý apparattaryn qoldana otyryp, elektr berý áýe jelilerin JI-defektoskopııalaý. Kompıýterlik kórý jáne mashınalyq oqytý tehnologııalary 4K-kameralar, jylý anyqtaý jáne lıdar júıelerinen alynǵan derekter negizinde tirek konstrýktsııalary men symdardaǵy aqaýlardy, qyzyp ketýlerdi, deformatsııalardy jáne basqa da jasyryn táýekelderdi avtomatty túrde anyqtaýǵa múmkindik beredi. Bul joba shyǵyndardy qysqartý esebinen 2,5 mlrd.teńge kóleminde ekonomıkalyq tıimdilik beredi dep kútilýde
- Akýstıkalyq rezonans tehnologııasyna negizdelgen jylý jelileriniń robottandyrylǵan qubyrishilik dıagnostıkasy. Bul sheshim júıeni ashpaı-aq jáne toqtatpaı-aq qubyrlardyń jaı-kúıin núktelik baǵalaýdy qamtamasyz etedi. Bul sheshim jóndeý jumystaryn tıimdi josparlaý arqyly 42 mlrd teńge kóleminde ekonomıkalyq nátıje bermek.
- Gaz salasyna arnalǵan JI-assıstent, ol mobıldi qosymshada túsirilgen fotosýret arqyly gaz eseptegishterdiń kórsetkishterin avtomatty túrde tanıdy. Bul adam faktoryn azaıtyp, esepke alýdyń dáldigin arttyrady.
Atalǵan sheshimderdiń barlyǵy pılottyq rejımde aprobatsııadan ótip, joǵary tıimdiligin kórsetti: dıagnostıka ýaqyty jedeldedi, apattylyq deńgeıi tómendedi jáne resýrstardy únemdeý aıtarlyqtaı artty. Prezıdent qoıǵan mindetterge sáıkes, 2026 jyly Energetıka mınıstrligi elektr jáne jylýmen jabdyqtaý salalarynda JI-sheshimderdi pılottyq kezeńnen aýqymdy engizýge kóshirýdi josparlap otyr.
Basym baǵyttardyń qatarynda: JI-defektoskopııadaǵy aqaýlar klassıfıkatorlaryn keńeıtý, magıstraldyq qubyrjoldarda qubyrishilik dıagnostıka tehnologııalaryn engizý, sondaı-aq gaz salasyndaǵy tsıfrlyq servısterdi odan ári damytý bar.
Sonymen qatar, Mınıstrlik jasandy ıntellekt tehnologııalaryn ázirleıtin otandyq ІT-kompanııalarmen qol qoıylǵan memorandýmdar aıasynda júıeli yntymaqtastyqty jalǵastyrady.
2026 jyldyń Tsıfrlandyrý jáne jasandy ıntellekt jyly dep jarııalanýy ozyq tehnologııalardy jedel engizýge jáne Qazaqstan energetıkasyn ornyqty, tsıfrlyq ári tehnologııalyq turǵydan táýelsiz salaǵa aınaldyrýǵa qýatty serpin beredi.
Aıta keteıik, Prezıdent kóshi-qon úderisterin jappaı tsıfrlandyrýdy óte ózekti másele retinde atady.