2026 jyly elimizde qansha adam júrgizýshi kýáliginen aıyryldy jáne oǵan ne sebep
ASTANA. KAZINFORM – Qazaqstanda 2025 jyldan 2026 jyldyń alǵashqy jartysyna deıin 25 myńnan astam adam mas kúıde kólik júrgizgeni úshin júrgizýshi kýáliginen aıyryldy. Bul týraly Kazinform agenttiginiń resmı saýalyna Bas prokýratýranyń Quqyqtyq statıstıka jáne arnaıy esepke alý komıteti usynǵan jaýabynda aıtylǵan.
Bir jarym jyldaǵy kórsetkish
Bas prokýratýranyń Quqyqtyq statıstıka jáne arnaıy esepke alý komıtetiniń málimetinshe, «Ákimshilik óndiristerdiń biryńǵaı tizilimi» aqparattyq júıesiniń derekterine sáıkes, Ákimshilik quqyqbuzýshylyq týraly kodekstiń 608-baby (kólik quralyn alkogoldik, esirtkilik nemese ýytqumarlyq masań kúıde basqarý) boıynsha 2025 jyldyń qorytyndysynda 17 220 adam júrgizýshi kýáliginen aıyrylǵan.
Al 2026 jyldyń alǵashqy alty aıynda dál osy bap boıynsha 7 825 júrgizýshi kólik basqarý quqyǵynan aıyryldy.
Sońǵy bir jarym jyl ishinde mas kúıde kólik júrgizgeni úshin 25 045 adam júrgizýshi kýáliginen aıyrylǵan.
Taǵy qandaı quqyqbuzýshylyqtar úshin kýálikten aırylady?
Komıtettiń málimetinshe, ákimshilik zańnamada júrgizýshi kýáliginen aıyrý jazasy kózdelgen ózge de quqyqbuzýshylyqtar bar.
2025 jyly Ákimshilik quqyqbuzýshylyq týraly kodekstiń 590-baby, kólik quraldaryn paıdalaný qaǵıdalaryn buzý boıynsha 812 adam júrgizýshi kýáliginen aıyryldy.
596-bap bolsa, kólik quralyn joldyń júrý bóliginde ornalastyrý, qarama-qarsy baǵytta júrý nemese basyp ozý qaǵıdalaryn buzý boıynsha 11 640 adam kólik basqarý quqyǵynan aıyrylǵan.
Al 606-bap, ıaǵnı jol-kólik oqıǵasyna ákep soǵýy múmkin qaýipti jaǵdaı týǵyzǵan jol qozǵalysy qaǵıdalaryn buzý boıynsha 27 júrgizýshi, 607-bap, temirjol ótkelderinen ótý qaǵıdalaryn buzý boıynsha 2 júrgizýshi júrgizýshi kýáliginen aıyryldy.
Sonymen qatar 610-bap, jol qozǵalysy qaǵıdalaryn buzý saldarynan adamdardyń densaýlyǵyna zııan keltirý nemese kólik quraldaryna ne ózge múlikke zalal keltirý boıynsha 823 adam, 611-bap, júrgizýshiniń jol-kólik oqıǵasyna baılanysty mindetterin oryndamaýy boıynsha 452 adam, 612-bap, kólik quralyn qujatsyz nemese basqarý quqyǵy joq adamnyń júrgizýi boıynsha 15 adam, al 613-bap, polıtsııa, kóliktik baqylaý nemese áskerı polıtsııa qyzmetkerleriniń zańdy talabyn oryndamaý, sondaı-aq alkogoldik, esirtkilik nemese ýytqumarlyq masań kúıin anyqtaý úshin medıtsınalyq kýálandyrýdan ótýden jaltarý boıynsha 845 adam júrgizýshi kýáliginen aıyrylǵan.
2026 jyldyń alǵashqy alty aıynda 590-bap boıynsha 816 adam, 596-bap boıynsha 4 970 adam, 606-bap boıynsha 1 adam, 607-bap boıynsha 2 adam, 610-bap boıynsha 564 adam, 611-bap boıynsha 255 adam, 612-bap boıynsha 9 adam, al 613-bap boıynsha 368 adam kólik basqarý quqyǵynan aıyryldy.
Qaı óńirlerde kórsetkish joǵary?
Ákimshilik quqyqbuzýshylyq týraly kodekstiń 608-baby boıynsha mas kúıde kólik júrgizgeni úshin júrgizýshi kýáliginen aıyrý derekteri eń kóp tirkelgen óńirler qatarynda Almaty men Astana qalalary, sondaı-aq Aqmola jáne Jambyl oblystary bar.
Almatyda 2025 jyly 2 156 adam, al 2026 jyldyń alǵashqy jartysynda 1 000 adam kólik basqarý quqyǵynan aıyryldy.
Astanada bul kórsetkish tıisinshe 1 420 jáne 647 adamdy qurady.
Aqmola oblysynda 2025 jyly 1 263 júrgizýshi, al bıylǵy alǵashqy alty aıda 546 júrgizýshi kýáliginen aıyrylǵan.
Jambyl oblysynda osy kezeńderde 947 jáne 470 adam júrgizýshi kýáliginen aıyryldy.
Aıta keteıik, buǵan deıin, Mańǵystaýda mas kúıinde qaıta kólik júrgizgen er adam túrmege qamalǵanyn jazǵan edik.
