2026 jyly elimizde qandaı jańa áýejaılar men reıster paıda bolady
ASTANA. KAZINFORM — Úkimet Prezıdent Qasym-Jomart Toqaevtyń tapsyrmasy boıynsha, ony ishinde Kólik mınıstrligi 2026 jyly azamattyq avıatsııa salasynda avıatsııalyq habtardy damytý jáne Qazaqstannyń tranzıttik áleýetin nyǵaıtý baǵytyndaǵy jumysyn jalǵastyrady.
QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva jumystyń negizgi baǵyttary týraly baıandady.
— Osy rette elimizdiń iri avıatsııalyq toraptarynda ınfraqurylymdyq jobalar keshenin iske asyrý josparlanyp otyr. Atap aıtqanda, Astana jáne Shymkent áýejaılarynda ekinshi ushý-qoný jolaqtarynyń qurylysy bastalady, Almaty áýejaıynyń ishki reıster termınaly qaıta jańǵyrtylady, sondaı-aq Aqtaý áýejaıynyń perronyna kúrdeli jóndeý júrgiziledi, — dep atap ótti ol.
Sonymen qatar óńirlik jobalar da júzege asyrylyp jatyr, onyń ishinde: Atyraý áýejaıynyń jańa termınalyn salý, Pavlodar áýejaıyn rekonstrýktsııalaý, Qatonqaraǵaı, Zaısan jáne Kendirli kýrorttyq aımaqtaryndaǵy áýejaılar qurylysyn aıaqtaý, Arqalyq áýejaıyn qalpyna keltirý. Infraqurylymdy jańǵyrtý sheńberinde áýejaılarda JetA-1 avıaotyn saqtaý jáne quıý júıeleri jańartylady. Bul avıakompanııalardy otynmen qamtamasyz etý men qyzmet kórsetý senimdiligin arttyrýǵa múmkindik beredi.
— Budan bólek, 2026 jyldyń sońyna deıin áýe kompanııalary 9 jańa áýe kemesin satyp alýdy josparlap otyr. Bul áýe parkin shamamen 118-ge deıin ulǵaıtyp, áýe tasymaldarynyń ótkizý qabiletin arttyrýǵa múmkindik beredi. Óńirlerdiń kólik qoljetimdiligin qamtamasyz etý jáne týrızmdi damytý maqsatynda áleýmettik mańyzy bar 23 áýe baǵyty boıynsha sýbsıdııalaý baǵdarlamasy jalǵasyn tabady, — dep túsindirdi Saltanat Tompıeva.
Sonymen qatar 2026 jyly halyqaralyq áýe qatynasyn damytý jumystary jalǵasady. Halyqaralyq jańa áýe baǵyttaryn ashý jáne buryn toqtatylǵan reısterdi jandandyrý, sondaı-aq qoldanystaǵy baǵyttar boıynsha reıster jıiligin arttyrý josparlanyp otyr. Baǵyttar jelisin Ortalyq Azııa men TMD elderine, sondaı-aq Taıaý Shyǵys, Eýropa jáne Azııa memleketterine keńeıtý kózdelgen. Atap aıtqanda, Vena, Tokıo, Rım, Abý-Dabı, Ár-Rııad, Dammam, Larnaka, Amman, Sıan, Shanhaı, Úrimshi, Qashǵar, Varshava jáne basqa da baǵyttar boıynsha reıster ashý josparlanýda. Sala kadrlaryn daıarlaý júıesin reformalaý jumystary jalǵasady, jańa avıatsııalyq oqý ortalyǵyn qurý máselesi pysyqtalady, sondaı-aq azamattyq avıatsııada tsıfrlyq sheshimderdi engizý, pasporttyq baqylaý, e-Freight júıesi jáne basqa da júıeler avtomattandyrylady.
— Sonymen qatar 2026 jyly ICAO-men birlese azamattyq avıatsııanyń Bas jospary ázirlenip, salany 2050 jylǵa deıin damytý strategııasy daıyndalady. Jalpy alǵanda, atalǵan mindetter keshendi jáne júıeli sıpatqa ıe bolyp, qazirgi ınfraqurylymdyq jáne retteýshi máselelerdi sheshýge, sondaı-aq salanyń uzaq merzimdi damýy úshin turaqty jaǵdaı qalyptastyrýǵa baǵyttalǵan. Olardyń júzege asýy áýe tasymaldarynyń sapasy men qoljetimdiligin arttyrýǵa, ushý qaýipsizdigin kúsheıtýge jáne Qazaqstannyń aımaqtyq jáne halyqaralyq avıatsııalyq júıedegi rólin nyǵaıtýǵa múmkindik beredi, — dep qorytyndylady sózin AAK tóraǵasy.
Budan buryn Petropavl áýejaıy óńirdiń negizgi mýltımodaldy logıstıkalyq habyna aınalatynyn jazǵan edik.