2026 jyly elimizde qandaı energııa nysandary iske qosylady
ASTANA. KAZINFORM – Bıyl Qazaqstanda dástúrli jáne jańartylatyn energııa kózderinen 2,64 GVt qýatty paıdalanýǵa berý josparlanyp otyr. Bul týraly Energetıka mınıstrliginiń baspasóz qyzmeti habarlady.
Atalmysh jobalardy iske asyrý 2027 jyldyń birinshi toqsanynyń sońyna qaraı eldegi energııa tapshylyǵy máselesin tolyq sheshýge, al 2029 jylǵa qaraı elektr energııasynyń turaqty profıtsıtine shyǵýdy qamtamasyz etýge múmkindik beredi.
Memleket basshysy Úkimettiń keńeıtilgen otyrysynda ótken jyly 3,7 mlrd kılovatt-saǵat energııa ımporttalǵanyn atap ótip, jańa qýattardy iske qosý jumysyn kúsheıtýdi tapsyrdy. Bıyl 4 bý-gaz qondyrǵysy (BGQ), 2 jel elektr stantsııasy, 4 kún elektr stantsııasy iske qosylady jáne eki elektr stantsııasyn keńeıtý josparlanyp otyr. Atalǵan energııa nysandary jylyna shamamen 16 mlrd kılovatt-saǵat energııa óndiredi.
Energııa qaýipsizdigin nyǵaıtýǵa qýaty 2,4 GVt bolatyn iri bý-gaz qondyrǵylary (BGQ) negizgi úles qosady. Bıyl ońtústik óńirlerdi elektr qýatymen jáne jylýmen qamtamasyz etetin 4 bý-gaz qondyrǵysy paıdalanýǵa beriledi. Atap aıtqanda, Qyzylorda oblysynda qýaty 240 MVt bolatyn BGQ iske qosý-retteý jumystary júrgizilýde, al Túrkistan oblysynda qýaty 1 GVt bolatyn qýatty BGQ qurylysy jalǵasyp jatyr.
Aýqymdy jańǵyrtý jumystary eldiń eń iri megapolısin de qamtydy: Almaty JEO-2 jáne JEO-3 alańdarynda jıyntyq qýaty 1,1 GVt bolatyn zamanaýı bý-gaz qondyrǵylary salynyp jatyr, bul qalany senimdi ári ekologııalyq taza energııamen qamtamasyz etedi.
Sonymen qatar «Tekeli energııa kesheni» (17 MVt) nysandarynda jáne Atyraý JEO-da óńirlik generatsııany núkteli nyǵaıtý jumystary júrgizilýde, onda jalpy qýaty 60 MVt bolatyn jańa týrboagregat pen qazandyq iske qosylady.
Energııa teńgerimin «jasyl» tehnologııalar esebinen ártaraptandyrýǵa erekshe kóńil bólinýde. 2026 jyly jańartylatyn energııa kózderiniń (JEK) pýly qýaty 245 megavatt bolatyn birqatar mańyzdy nysandarmen tolyǵady.
Qostanaı oblysynda 2 jel elektr stantsııasy iske qosylady: 50 megavattyq «Aspan Energo» jáne 100 megavattyq «Gıperboreıa». Mańǵystaý, Jambyl, Qostanaı jáne Jetisý oblystarynda jıyntyq qýaty 92 megavatt bolatyn 4 kún elektr stantsııasyn iske qosylmaq. Sonymen qatar Túrkistan oblysynda «TAÝENERGO» kompanııasynyń shaǵyn GES-i jumysyn bastaıdy.
Eske salsaq, budan buryn Qazaqstan, Qyrǵyzstan jáne Ózbekstan sý-energetıkalyq yntymaqtastyqty kúsheıtýdi josparlap otyrǵanyn jazǵanbyz.