2026 jyly elimizde 47 myń oqýshyǵa arnalǵan 90 mektep salynady
ASTANA. KAZINFORM – QR Oqý-aǵartý mınıstrligi apatty jáne úsh aýysymdy mektepterdiń máselesin sheshý baǵytynda júıeli jumystar júrgizip jatyr. Bıyl elimizde 47 myńǵa jýyq oqýshy ornyna arnalǵan 90 jańa mekteptiń qurylysy josparlanǵan.
Jańa oqýshy oryndaryn paıdalanýǵa berý Arnaıy memlekettik qor qarajaty, Bilim berý ınfraqurylymyn qoldaý qory, jergilikti bıýdjet qarajaty jáne jeke ınvestıtsııalar esebinen júzege asyrylady.
Jańa mektepterdiń basym bóligi Astana jáne Shymkent qalalarynda, sondaı-aq Aqtóbe, Atyraý, Shyǵys Qazaqstan, Jambyl, Jetisý, Batys Qazaqstan jáne Túrkistan oblystarynda salynyp jatyr.
- Sonymen qatar bilim berý uıymdaryn zamanaýı jabdyqtarmen qamtý jumysy da jalǵasýda. Qosymsha hımııa, fızıka, bıologııa, robototehnıka jáne STEM baǵyttary boıynsha 1000 zamanaýı pándik kabınet satyp alynyp, ornatylýda. Sońǵy úsh jyl ishinde 4320 pándik kabınet satyp alynǵan, - dep jazdy mınıstrlikten.
Memleket basshysynyń tapsyrmasyna sáıkes, biryńǵaı zamanaýı mektep ınfraqurylymy formatyna kóshý maqsatynda 2029 jylǵa deıin 1300 mektepti, onyń ishinde aýyldyq jerlerdegi 900 mektepti renovatsııalaý baǵdarlamasy júzege asyrylyp jatyr. Ótken jyldyń qorytyndysy boıynsha 209 mektepte renovatsııa jumystary aıaqtaldy. 2026 jyly taǵy 98 mektepte jańǵyrtý jumystary jalǵasady.
Renovatsııa aıasynda mektepterdi kúrdeli jóndeý, zamanaýı pándik kabınettermen jabdyqtaý, mektep jıhazdaryn jańartý, kitaphanalar men ashanalardy jańǵyrtý, sport zaldaryn salý nemese rekonstrýktsııalaý, qoǵamdyq keńistikterdi abattandyrý jáne qaýipsizdik júıelerimen qamtamasyz etý kózdelgen.
Aıta keteıik, 2025 jyldyń qorytyndysy boıynsha elimizde 236 myńǵa jýyq oqýshy ornyna arnalǵan 162 mekteptiń qurylysy aıaqtaldy. Jalpy sońǵy úsh jylda 746 myń oqýshy ornyna arnalǵan 584 mektep paıdalanýǵa berilgen.
Eske salaıyq, buǵan deıin Oqý-aǵartý mınıstrliginiń bıýdjet shyǵyndaryn únemdeýge kiriskeni habarlandy.