2026 jyly elimiz sýtekti energetıkany paıdalana bastaıdy

ASTANA. KAZINFORM – Qazaqstanda sýtekti energetıkany damytý úshin ınstıtýtsıonaldyq baza qalyptastyrylyp jatyr. Tolyǵyraq Energetıka vıtse-mınıstri Іlııas Baqytjan aıtyp berdi.

Onyń aıtýynsha, Energetıka mınıstrligi 2030 jylǵa deıingi sýtekti energetıkany damytý tujyrymdamasyn belsendi túrde ilgeriletip jatyr. Bul qujat tehnologııany synaqtan ótkizýge, ınvestıtsııa tartýǵa, sondaı-aq salanyń normatıvtik jáne tehnıkalyq bazasyn qalyptastyrýǵa múmkindik beretin birqatar pılottyq jobany iske qosýdy kózdeıdi.

– 2026 jyly bý-gaz qondyrǵylarynda sýtekti paıdalana bastaýdy, 2027 jyly qoǵamdyq kólikte sýtekti qoldaný, al 2028 jyly alǵashqy sýtek quıý stantsııalaryn salýdy josparlap otyrmyz, – dedi Іlııas Baqytjan.

Sondaı-aq mınıstr orynbasary sýtekti energetıka salasyndaǵy alǵashqy iri joba Mańǵystaý oblysynda nemistiń Svevind Energy Group kompanııasynyń qoldaýymen iske asyrylyp jatqan Hyrasia One jobasy týraly aıtty.

– Joba jalpy qýattylyǵy 40 GVt bolatyn jańartylatyn energııa kózin salýdy jáne jylyna 2 mıllıon tonnaǵa deıin jasyl sýtek nemese 11 mıllıon tonna ammıak óndirýdi kózdeıdi, – dep tolyqtyrdy vıtse-mınıstr.

Onyń málimdeýinshe, aldyn ala ınjenerlik ázirleme kezeńi aıaqtalyp, eki jyldyq ekologııalyq saraptama júrip jatyr. Bolashaqta bul joba 1800-ge deıin jumys ornyn qamtamasyz etýi múmkin.

Sondaı-aq mınıstrlik halyqaralyq seriktestermen de jumys júrgizip jatyr. Atap aıtqanda, Astanadaǵy sýtekti dıplomatııa keńsesimen dıalog jolǵa qoıylǵan. Sonymen qatar sýmen qamtamasyz etý, sý burý, tasymaldaý jáne sýtekti Eýropalyq odaqqa eksporttaý áleýetine qatysty zertteýler júrgizilip jatyr. Odan bólek, tehnıkalyq máseleler sarapshylar deńgeıinde de talqylandy.

Osy oraıda vıtse-mınıstr Qytaımen yntymaqtastyqty erekshe atap ótti. Qazaqstan China Energy korporatsııasymen jumys istep jatyr. Kompanııa respýblıkada sýtek óndirisin jergiliktendirýge, EPC-kelisimsharttarǵa jáne sýtek klasterin qurýǵa múddeli. Sýtekti energetıka boıynsha birlesken zerthanany qurý jóninde memorandýmǵa qol qoıylǵan.

Qazir Májilistiń Ekologııa máseleleri jáne tabıǵatty paıdalaný komıtetinde «Qazaqstan Respýblıkasynyń sýtegi energetıkasyn damytý perspektıvalary» taqyrybynda dóńgelek ústel ótip jatyr.

Eske salaıyq, byltyr elimizde sýtegi energetıkasyn damytýdyń 2030 jylǵa deıingi tujyrymdamasy bekitildi.