2026 jyly dıvıdend alatyn jeke tulǵalar salyq jeńildiginen aıyrylady
ASTANA. KAZINFORM — 2026 jyly dıvıdend alatyn jeke tulǵalarǵa da progressıvti salyq shkalasy qoldanyla bastaıdy. Onyń sharttaryn Qarjy mınıstrligi Memlekettik kirister komıteti Salyq ádisnamasy basqarmasy basshysynyń orynbasary Aıgúl Abbasova túsindirdi.
— Jeke tulǵalar alatyn dıvıdendterge (qandaı da bir kompanııada úlesi, aktsııasy bar jeke tulǵalardyń osy kompanııadan tabys retinde alatyn paıdasy) jeke progressıvti shkala qarastyrylǵan. Bul jerde shkalanyń tabaldyryǵy áldeqaıda joǵary — 230 myń AEK. Basqasha aıtsaq, dıvıdend kólemi 995 mln teńgeden tómen bolsa, 5 paıyz jeke tabys salyǵy salynady. Al 995 mln teńgeden kóp bolsa, 15 paıyz salyq salynady, — dedi ol.
Bul dıvıdendterge qazir qoldanylatyn jeńildikter kúshin joıady degen sóz.
— Qazir dıvıdendten alynatyn jeke tabys salyǵy 10 paıyz. Biraq jeńildik bar. Eger jeke tulǵa zańdy tulǵadan 30 myń AEK-ke jetpeıtin (100 mln teńge shamasynda) dıvıdend alsa, eshqandaı salyq salynbaıdy. Al 2026 jyldan bastap bul jeńildik kúshin joıyp, 995 mln teńgege deıin dıvıdend alǵandardyń bári 5 paıyz jeke tabys salyǵyn tóleıdi, — dedi basqarma basshysynyń orynbasary.
Eske salsaq, sáýir aıynda Májilis depýtaty Ermurat Bapı bankterdiń 100 mln teńgege deıin dıvıdend alatyn aktsıonerlerine 10 paıyz, al bir mlrd teńgege deıin paıda tabatyn aktsıonerlerine 15 paıyz salyq salý normasyn usynǵan bolatyn.