2026 jyly ambýlatorııalyq dári-dármekti jeke dárihanalar arqyly usyný múmkin bolady
ASTANA. KAZINFORM — 2026 jyly dári-dármektiń qoljetimdiligin arttyratyn joba iske qosylady. Bul týraly búgin Úkimet otyrysynda Densaýlyq saqtaý mınıstri Aqmaral Álnazarova aıtty.
— Kelesi jyldyń basynan bastap jeke dárihana uıymdary arqyly ambýlatorııalyq dári-dármekpen qamtamasyz etýdi ortalyqsyzdandyrý jobasyn iske qosýdy josparlap otyrmyz. Joba halyq úshin dárilik zattardyń qoljetimdiligin arttyryp, olarǵa qajetti preparattardy tańdaý múmkindigin beredi, — dedi ol.
Mınıstrdiń atap ótýinshe, qazirdiń ózinde densaýlyq saqtaý júıesindegi jasandy ıntellekt tehnologııalary otandyq klınıkalarda flıýorografııa, mammografııa, rentgenografııa, KT jáne MRT taldaý kezinde ınsýlt, ókpe, sút bezi qaterli isikteri men pnevmonııany anyqtaý úshin qoldanylady.
— Birqatar medıtsınalyq uıymda dárigerlerge tekserý nátıjelerin jyldam taldaýǵa jáne patsıentterge kóbirek ýaqyt bólýge kómektesetin jasandy ıntellekt assıstentter jumys isteı bastady. Jasandy ıntellekt dárigerdi almastyrmaıtynyn, kerisinshe onyń múmkindikterin kúsheıtetinin, medıtsınany barlyq azamat úshin zamanaýı ári qoljetimdi etetinin atap ótken jón, — dedi Aqmaral Álnazarova.
Buǵan deıin 2026 jyly MÁMS derekterin beretin memlekettik organdardyń tizimi jańartylatynyn jazǵan edik.