2026 jyly bıýdjet shyǵysy 2 trln teńgege ulǵaıady: alańdaýǵa sebep bar ma

ASTANA. KAZINFORM — Keler jyly respýblıkalyq bıýdjettiń shyǵys bóligi artady degen boljam bar. Onyń sebebin Qarjy mınıstri Mádı Takıev túsindirip berdi.

— 2026 jylǵy kiris pen bıýdjet tapshylyǵyn esepke alǵanda, shyǵys bıylǵy josparmen salystyrǵanda, 2 trln teńgege artyp, 27,7 trln teńgeni jetedi, al 2028 jylǵa qaraı 29,7 trln teńgege deıin ósedi. 2026 jylǵa arnalǵan respýblıkalyq bıýdjettiń shyǵysy osy jylmen salystyrǵanda, 2 trln teńgege ulǵaıady degen jospar bar. Kelesi jyldyń bıýdjeti, alǵash ret Ulttyq qordan nysanaly transfertin paıdalanbaı teńgerimdeldi jáne naqty sektordaǵy memlekettik qoldaý sharalarynyń aýqymdy ósýimen áleýmettik baǵdarlanǵan kúıinde qaldy. Bul rette shyǵysty ońtaılandyra otyryp, basymdyq berý boıynsha tıisti jumys júrgizildi, — dedi Mádı Takıev Úkimet otyrysynda.

Vedomstvo basshysynyń aıtýynsha, aǵymdyq bazalyq shyǵys úlesi 15%-dan 12,3%-ǵa deıin tómendedi. Al bıýdjet jumsaýda áleýmettik baǵdarlamalardy iske asyrýǵa basymdyq beriledi.

— Áleýmettik salaǵa arnalǵan shyǵys deńgeıi, birqatar baǵyt boıynsha qaıta qaralyp, shyǵystyń jalpy kólemi 38,7% qurap otyr. Ońtaılandyrylǵan shyǵys, naqty sektorǵa qaıta baǵyttaldy. Ekonomıkanyń ósýin yntalandyratyn shyǵys kólemi 0,9%-dan 16,1%-ǵa deıin ulǵaıyp, 4 trln 470 mlrd teńgeni qurady, — deıdi ol.

Buǵan deıin Úkimet basshysy Oljas Bektenov memlekettik bıýdjet shyǵynyn qatań baqylaýda ustaýdy tapsyrdy.