2026 jyly «Bolashaq» stıpendııasyn taǵaıyndaý tártibine ózgeris engiziledi

ASTANA. KAZINFORM — 2026 jyldan bastap «Bolashaq» halyqaralyq stıpendııasyna irikteý erejeleri ózgeredi. Bul týraly Halyqaralyq baǵdarlamalar ortalyǵynda ótken brıfıngte málim etildi. 

Endi konkýrs kezeń-kezeńimen irikteý tetigi arqyly ótedi. Birinshi týrda shekti ball jınaǵan úmitkerler ǵana ekinshi kezeńge jiberiledi.

— 2025 jylǵy úsh irikteý qorytyndysy boıynsha 131 úmitker birinshi týrda ótý balyn jınaı almaǵan. Bul qabyldanǵan ótinimderdiń 5,0 paıyzy, — dep atap ótti ortalyqta.

Sonymen qatar sheteldik joǵary oqý oryndaryna qoıylatyn jańa talaptar engizildi. Shákirtaqy ıegerleri tek QS University Rankings by Subject halyqaralyq akademııalyq reıtınginiń top-100 qataryna kiretin oqý oryndarynda bilim ala alady.

Budan bólek, jaratylystaný-tehnıkalyq baǵytqa basymdyq berý naqty bekitildi. Bul baǵyttaǵy stıpendııalardyń úlesi endi keminde 60 paıyz bolýy tıis.

— «Bolashaq» stıpendııasy jaratylystaný-tehnıkalyq baǵyt boıynsha 2022 jyly 59,2 paıyz bolsa, 2025 jyly 69,6 paıyzǵa deıin artty, — dep málimdedi baǵdarlama ókilderi.

Sonymen qatar taǵy bir ózgeris — baǵdarlama túlekterine eńbekpen óteýdi BUU, BUUDB, EQYU, ShYU jáne ózge de halyqaralyq ári óńirlik uıymdarda ótýge ruqsat etiledi.

Sonymen birge orys tili memlekettik nemese resmı til bolyp sanalmaıtyn elderde orys tilinde oqý nemese taǵylymdamadan ótý múmkindigi alynyp tastaldy.

Sondaı-aq úmitkerlerge konkýrsqa qaıta qatysý quqyǵy berildi.

Halyqaralyq baǵdarlamalar ortalyǵynyń dereginshe, 2025 jyly 2 600 ótinim qabyldanǵan. Bul 2024 jylmen salystyrǵanda (1 893 ótinim) aıtarlyqtaı kóp.

Osy rette bir orynǵa shaqqandaǵy konkýrs 4,1 adamǵa deıin artqan. Al 2024 jyly bul kórsetkish 3,1 adam bolǵan.

Buǵan deıin «Bolashaq» halyqaralyq stıpendııasynyń sany qysqartylǵanyn jazǵanbyz.