2026 jyly balyq baǵasy 10-12 paıyz túsedi — AShM

ASTANA. KAZINFORM — Aýyl sharýashylyǵy mınıstrligi Balyq sharýashylyǵy komıtetiniń tóraǵasy Serik Sermaǵambetov ortalyq kommýnıkatsııalar qyzmetinde ótken baspasóz máslıhatynda kelesi jyly áleýmettik mańyzy bar balyq ónimderiniń baǵasy 10-12 paıyz túsetinin aıtty.

— Osy ýaqytqa deıin áleýmettik mańyzy bar taýarlar tiziminde balyq ónimderi bolǵan joq. Endi enip jatyr. Negizgi bes túrin ǵana belgilep otyrmyz. Kúndelikti halyq tutynatyn, keńinen taralǵan tuqy tuqymdastaryna jatatyn qarakóz, taban, jaıyn, aqmarqa, dóńmańdaı sııaqty balyqtar qoljetimdi bolý kerek dep otyrmyz. Qalǵan balyqtardy aıtsaq, bekire, albyrt tuqymdas balyqtardy áleýmettik mańyzy bar taýarlar tizimine engizý durys emes dep oılaımyn. Óıtkeni ózindik quny óte qymbat, — dedi ol.

Komıtet basshysy memleket keıingi jyldary balyq ósirem deýshilerge kóp kómek kórsetkenin, endi sonyń óteýin halyq kóretin kez kelgenin aıtady.

— Tuqy balyqtardyń óndirisi bıyl 20 myń tonna bolsa, kelesi jyly 30 myń tonnaǵa jetý kerek. Osylaısha jańaǵy áleýmettik tizimdegi balyq baǵasy túsedi. Balyq ósirýshiler sany kóbeıýine baılanysty baǵa 10-12 paıyzǵa deıin túsedi degen boljamdarymyz bar. Akvasharýashylyq týraly zań qabyldanǵan 4 aıdyń ishinde balyq ósirýshiler sany birden kóbeıdi. Endi olardyń ónimi kelesi jyly naryqqa shyǵady. Baǵanyń ózgerýi osy kezge sáıkes keledi, — dedi Serik Sermaǵambetov.

Buǵan deıin elimizdiń qaı óńiri balyq ónimderin kóp tutynatynyn jazǵan edik.