2026 jyly aılyq tabysy 3 mln teńgeden asqan jeke tulǵalar 15 paıyz jeke tabys salyǵyn tóleıdi
ASTANA. KAZINFORM — Qarjy mınıstrligi Memlekettik kirister komıteti Salyq ádisnamasy basqarmasy basshysynyń orynbasary Aıgúl Abbasova 2026 jyly jeke tabys salyǵyna qoldanylatyn progressıvti shkala qalaı jumys isteıtinin túsindirdi.
— 2026 jyldyń qańtarynan bastap jalpyǵa birdeı salyq rejımin qoldanatyn jeke kásipkerler men fermerlik sharýa qojalyqtarynan basqa jeke tulǵalardyń bári dıvıdend túrindegi tabystan bólek tabysynyń bárine progressıvti shkala boıynsha jeke tabys salyǵyn tóleıdi. Bul úshin tabys kólemi jylyna 8500 aılyq eseptik kórsetkishten (36 mln teńge) joǵary bolýy kerek. Jyldyq tabysy bul somaǵa jetpeıtinder 10 paıyz kóleminde jeke tabys salyǵyn tóleıdi. Al bul somadan asqandardyń bári 15 paıyz tóleıdi. Sonda bizde progressıvti salyq shkalasynyń eki satysy bolady degen sóz, — dedi ol onlaın brıfıngide.
Bul jerde jeke tabys salyǵy jeke tulǵanyń eńbekaqysymen ǵana shektelmeıtinin eskerý kerek.
— Jeke tulǵa bir jyldaǵy tabysynyń bárin esepteý kerek. Mysaly, birneshe jerde jumys isteıtinder bolady. Olarǵa búkil jumysynan túsetin tabystyń jyldyq jıyntyǵyn esepteý kerek. Bir negizgi jumysynyń syrtynda shetelden tabys alatyndar nemese qosymsha kásipkerlikpen aınalysatyndar aılyǵynan tys tabysyn jyl qorytyndysynda qosyp esepteıdi.
Progressıvti shkala jeke tulǵanyń taza tabysyna qoldanylmaıdy. Salyq jeńildikteri esebinen shegerilgen jeke tabysynyń mólsheri esepke alynady, — dedi Aıgúl Abbasova.
Buǵan deıin 2026 jyly BJZQ-dan beriletin zeınetaqy tólemderi jeke tabys salyǵynan bosatylatynyn jazǵan edik.