2026 jyly Almatyda jastarǵa arnalǵan jańa joba iske qosylady

ALMATY. KAZINFORM – Almatyda jastardyń úzdik jobalary iriktelip, ol bıýdjet qarajaty esebinen qarjylandyrylady. 

Almaty qalasy jastar saıasaty basqarmasynyń málimetinshe, kelesi jyly megapolıste «Jastar bıýdjetke qatysýy» jobasyn júzege asyrý qarastyrylǵan.

Bastamanyń maqsaty – jastardyń azamattyq belsendiligin arttyrý ári qalanyń damýyna tikeleı qatysýyna jaǵdaı jasaý.

– Jobaǵa 14 pen 35 jas aralyǵyndaǵy Almaty qalasynyń turǵyndary ǵana qatysa alady. Ár qatysýshy tek bir jobany jáne bir baǵyt boıynsha ǵana usyna alady. Joba qoǵamdyq oryndarda júzege asyrylýy tıis jáne qalalyq ákimdik quzyryndaǵy salalarǵa sáıkes kelýi qajet, - dep habarlady basqarmadan.

Vedomstvo málimetinshe, «Jastardyń bıýdjetke qatysýy» jobasy 5 negizgi kezeńge bólinedi: 

1. Ótinim qabyldaý. Jobaǵa qatysqysy keletin jastar jasalmaty.kz onlaın-platformasy arqyly jeke kabınet ashyp, óz ıdeıalaryn joba retinde tirkeıdi. Joba sıpattamasy, bıýdjet esebi, vızýaldy materıaldar júkteledi.

2. Saraptamalyq baǵalaý. Arnaıy komıssııa jobalardy baǵalaıdy. Komıssııa quramynda: jastar saıasaty basqarmasy, memlekettik organdar ókilderi, ÚEU jáne jastar belsendileri bolady. Joba áleýmettik mańyzdylyǵyna, iske asyrý múmkindigine ,aýqymdylyǵyna qaraı baǵalanady.

3. Daýys berý. Jobalar onlaın daýys berý kezeńine ótedi. Almaty qalasynyń 14–35 jas aralyǵyndaǵy jastary ǵana daýys bere alady. Ár qatysýshy 3 túrli jobaǵa deıin daýys bere alady. Aýtentıfıkatsııa ETsQ nemese SMS-kod arqyly júrgiziledi.

4. Jobalardy iske asyrý. Jeńimpaz jobalar memlekettik áleýmettik tapsyrys aıasynda júzege asyrylady. Jobalardy jeke jáne zańdy tulǵalar iske asyra alady.

5. Monıtorıng. Іske asqan jobalar turaqty túrde baqylanyp, qoǵamdyq baqylaýǵa alynady. Oǵan avtorlar, jastar keńesteri, memlekettik organ ókilderi jáne qoǵam ókilderi qatysady.

– Joba – jastarǵa óz ıdeıalaryn naqty iske asyrýǵa múmkindik beretin tıimdi tetik. Ol arqyly jastar tek joba usynýmen shektelmeı, qalany basqarýǵa belsendi qatysady, - dep málimdedi vedomstvo.

Eske salaıyq, 2020 jyly elimizde «Halyq qatysatyn bıýdjet» jobasy iske qosyldy. 

Byltyr Almatyda «Halyq qatysatyn bıýdjet» baǵdarlamasyna 6 myńnan astam ótinish túsken.