2026 jyly «Almaty-Tokıo» tikeleı áýe reısi ashylady
ASTANA. KAZINFORM — Keler jyldan bastap qazaqstandyqtar Almatydan Japonııa astanasy Tokıoǵa tikeleı usha alady.
— Kólik jáne logıstıka salasyna basa nazar aýdaryldy. Bul turǵyda Japonııanyń úkimeti «Orta dáliz» baǵyty boıynsha Aqtaý portyndaǵy kedendik qyzmetti tsıfrlandyrýǵa qoldaý bildirdi. Qazaqstanmen áýe qatynasyn keńeıtý aıasynda kelesi jyly «Almaty-Tokıo» tikeleı áýe reısi ashylmaq. Budan basqa, atom energetıkasy, ıadrolyq otyn óndirisi men eksporty, ıadrolyq medıtsına salasy boıynsha yntymaqtastyqtyń bolashaǵy zor, — dedi Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileý BAQ aldynda málimdeme jasap.
Mınıstrdiń aıtýynsha, elimizde jasyl transformatsııa men joǵary tehnologııaǵa qajetti sırek ári mańyzdy elementterdiń qory mol.
— Sonyń ishinde, Japonııada «jasyl» tehnologııany óndirýge qajetti 32 shıkizattyń 22-si Qazaqstanda óndiriledi. Osyǵan oraı, áriptesimmen «Taý-Ken Samuryq» jáne Japonııanyń munaı, gaz jáne metal korporatsııasy «JOGMEC» arasynda naqty ınvestıtsııalyq jobalardy júzege asyrýǵa nıet bildirdik, — deıdi ol.
Aıta keteıik, búgin Astanaǵa alǵash resmı saparmen Japonııa Syrtqy ister mınıstri Takeshı Ivaıa keldi. Kezdesý barysynda ekijaqty qarym-qatynasty jańa deńgeıge kóterý jolyndaǵy máseleler talqylandy.
Shara barysynda elimizge Japonııadan 9 mlrd dollar ınvestıtsııa tartylǵany belgili boldy.