2026 jyly Almaty áýejaıynyń aýmaǵyna avtobýstar kiretin bolady
ALMATY. KAZINFORM – Almaty áýejaıynyń aýmaǵynda avtobýs aıaldamasy bolady.
Túrksib aýdanynyń ákimi Baqytjan Aqjarovtyń aıtýynsha, áýejaı avtoturaǵynda qurylys jumystary júrip jatyr. Sondyqtan onda ázirge avtobýs kire almaıdy.
— Áýejaıdyń ózinde úlken jańǵyrtý jumystary júrgizilip jatyr. Jańa termınal ashyldy, qazir ishki termınal jóndelýde. Sonymen qatar avtoturaq aımaǵy, kirý-shyǵý joldary, kireberis aýmaǵy qaıta qurylyp jatyr. Bul jumystarǵa baılanysty qoǵamdyq kóliktiń áýejaı aýmaǵyna kirýi qıyndady. Aıaldama ýaqytsha Maılın kóshesine ornalastyryldy, — dedi ol.
Baqytjan Aqjarov barlyq jumystar aıaqtalǵan soń, aıaldama 2026 jyly qaıtadan áýejaı aýmaǵyna qaıtarylatynyn atap ótti.
Eske salaıyq, buǵan deıin Almaty halyqaralyq áýejaıyn basqarýshy TAV Airports kompanııasy áýe aılaǵyn 2050 jylǵa deıin damytýdyń bas josparyn tanystyrdy.
2025-2028 jyldar aralyǵyndaǵy birinshi kezeńde áýejaı ınfraqurylymyna 362 mln AQSh dollary jumsalmaq. Onyń aıasynda 130 joba iske asyrylady.