2026 jyly áleýmettik-eńbek salasyna bıýdjet shyǵysy 15,1% ósti
ASTANA. KAZINFORM – Jalpy 2026 jyly áleýmettik-eńbek salasyna respýblıkalyq bıýdjettiń shyǵysy 6 trln 833 mlrd teńge somasyna kózdelgen. Bul 2025 jylǵy shyǵystardan 15,1% - ǵa nemese 897,7 mlrd teńgege artyq. Áleýmettik-eńbek salasyna jumsalatyn shyǵystar JІÓ-ge qatysty 3,7%, al respýblıkalyq bıýdjetke-24,6%. Bul týraly Eńbek jáne halyqty áleýmettik qorǵaý mınıstrligi habarlady.
Kózdelgen shyǵystardyń 99,3% nemese 6 trln 783 mlrd azamattarǵa áleýmettik tólemderge baǵyttalatyn bolady. Onyń ishinde 4 trln 890 mlrd teńge zeınetaqymen qamsyzdandyrýǵa qarastyrylǵan. Bul 2,6 mln zeınetkerdi qamtýǵa, 1 trln 893 mlrd teńge – barlyq járdemaqyny tóleýge múmkindik beredi. Bul shamamen 2,3 mln adamdy qamtýǵa múmkindik beredi.
Qalǵan qarajat múgedektigi bar adamdarǵa protezdik-ortopedııalyq kómek kórsetý, estý qabileti buzylǵan balalarǵa estý-sóıleýdi ońaltý, ońaltý ortalyqtaryn salý, zeınetaqy men járdemaqy tóleýdi qamtamasyz etý boıynsha qyzmetter kórsetýge jáne t. b. baǵyttalatyn bolady.
Buryn atap ótkendeı, búgingi kúni respýblıkalyq bıýdjet qarajaty esebinen bazalyq jáne yntymaqty zeınetaqyny qosa alǵanda, áleýmettik tólemderdiń 41 túri tólenedi. 2025 jyly járdemaqylar men zeınetaqylardy tóleýge 4,6 mln adamǵa 5 trln 858 mlrd teńge jiberildi. Onyń ishinde 2,5 mln-ǵa jýyq zeınetkerler men 2,1 mln-nan astam memlekettik járdemaqy alýshylar.
QR Eńbek jáne halyqty áleýmettik qorǵaý mınıstrligi qabyldaǵan áleýmettik tólemder boıynsha barlyq mindetteme ýaqytyly jáne tolyq kólemde oryndaldy.
Buǵan deıin kópbalaly otbasylardyń járdemaqysy qanshalyqty kóbeıgenin jazǵan bolatynbyz.
2026 jyldan múgedektigi bar jandarǵa járdemaqy 10 paıyz ósedi.
Halyqty áleýmettik qorǵaý salasyndaǵy retteý jáne baqylaý komıteti departamentiniń basshysy Dámejan Sádýaqasova 2026 jyldyń 1 qańtarynan bastap zeınetaqy tólemderi men járdemaqylardyń qanshalyqty artatynyn túsindirdi.
