2026 jyly álemde ómir súrýge jáne kásip júrgizýge qolaıly qalalar reıtıngi jarııalandy
ASTANA. KAZINFORM — Oxford Economics ázirlegen 2026 jylǵy Global Cities Index reıtınginde alǵashqy 100 orynnyń 78-in Eýropa men Soltústik Amerıka qalalary ıelendi. Reıtıngke Eýropadan 44 qala, AQSh-tan 30 qala jáne Kanadadan taǵy 4 qala endi, dep habarlaıdy Euronews.
Indeks álemdegi iri qalalardyń ekonomıkalyq áleýetin turǵyndardyń ómir súrý sapasymen qanshalyqty ushtastyra alatynyn kórsetedi.
Baǵalaý kezinde adam kapıtalynyń damý deńgeıi, ekologııalyq turaqtylyq jáne qalany basqarýdyń tıimdiligi de eskeriledi.
Global Cities Index 2026 reıtınginde kósh bastaǵan qalalar:
• 2 oryn — London
• 3 oryn — Parıj
• 6 oryn — Dýblın
• 10 oryn — Tsıýrıh
Álemdik úzdik ondyqqa engen AQSh qalalary:
• Nıý-Iork
• Sıetl
• San-Frantsısko
• Boston
• San-Hose
Eýropada joǵary oryndarǵa ıe bolǵan qalalar:
• Oslo
• Stokgolm
• Kopengagen
— AQSh qalalarynyń joǵary oryn alýyna olardyń «Ekonomıka» jáne «Adam kapıtaly» sanattaryndaǵy myqty kórsetkishteri yqpal etti. Al Eýropa qalalarynda «Ómir súrý sapasy», «Ekologııa» jáne «Memlekettik basqarý» kórsetkishteri joǵary boldy, — dedi Oxford Economics kompanııasynyń qalalarmen jumys jónindegi bóliminiń dırektory Lıam Saıds.
Ómir súrý sapasyna, ekologııaǵa jáne tıimdi basqarýǵa basymdyq beretinder úshin Eýropanyń jetekshi qalalary joǵary kórsetkishterimen erekshelenedi. Parıj ómir súrý sapasy boıynsha joǵary baǵalansa, Dýblın ekologııa men memlekettik basqarý baǵyttarynda jaqsy nátıje kórsetti. Al Tsıýrıh pen Oslonyń basty artyqshylyǵy memlekettik basqarý kórsetkishi boldy. Oslo bul sanatta Eýropa men AQSh-tyń jetekshi qalalary arasynda eń joǵary nátıjege ıe boldy.
Ekonomıkalyq qýaty men bilikti kadrlarǵa qoljetimdiligin basty orynǵa qoıatyn bıznes úshin AQSh qalalarynyń kórsetkishteri joǵary. Nıý-Iork ekonomıka sanatynda eń joǵary upaıǵa ıe boldy. Sıetl, San-Frantsısko jáne San-Hose de osy baǵytta joǵary nátıje kórsetti. Al Los-Andjeles ekonomıkalyq kórsetkishteriniń joǵarylyǵymen qatar, ómir súrý sapasy boıynsha da jaqsy nátıjege ıe.
London Eýropa qalalary arasynda erekshe nátıje kórsetti. Ol búkil reıtıng boıynsha «Adam kapıtaly» sanatynda eń joǵary upaı jınady. Bul qaladaǵy ýnıversıtetterdiń deńgeıi, damyǵan iskerlik orta jáne bilikti mamandardy tartý múmkindigimen baılanysty. Alaıda «Ómir súrý sapasy» kórsetkishi boıynsha Londonnyń nátıjesi tómen boldy — qala bul sanatta 77 upaı jınaǵan.
Degenmen eki óńirge de ortaq kúrdeli másele — turǵyn úıdiń qoljetimdiligi.
Baıandamada London, Dýblın jáne Nıý-Iork qalalarynda turǵyn úıge ketetin shyǵyndardyń joǵary bolýy áli de ózekti másele ekeni ataldy. Bul qalalarda tabys deńgeıi joǵary bolǵanymen, baspanaǵa jumsalatyn shyǵyndardyń kóptigi ómir súrý sapasynyń kórsetkishterine keri áser etip otyr.
Buǵan deıin Seýl álemniń úzdik úsh qalasynyń qataryna enýi múmkin ekeni habarlanǵan bolatyn.
Aqzat Jıenalına
