2026 jyly álem halqy 690 mln márte saıahatqa shyqqan
ASTANA. KAZINFORM — 2026 jyldyń birinshi jartysynda álem boıynsha týrıstik saıahattar sany 0,4%-ǵa ósip, shamamen 690 mıllıon saparǵa jetti.
Geosaıası turaqsyzdyqqa, munaı baǵasynyń joǵary bolýyna jáne ınflıatsııa qysymyna qaramastan, halyqaralyq saparlar sany ótken jyldyń sáıkes kezeńimen salystyrǵanda shamamen 3 mıllıonǵa ósken.
BUU Dúnıejúzilik týrızm uıymynyń (UN Tourism) sońǵy Álemdik týrızm barometrine sáıkes, jyldyń birinshi jartysynda eń joǵary ósý qarqyny Afrıkaǵa tıesili — 4%, Eýropa elderi 3%-ǵa kóp saıahattaǵan. Amerıkada halyqaralyq saparlar 2%-ǵa, al Azııa jáne Tynyq muhıty aımaǵynda 1%-ǵa ósti. Al, Taıaý Shyǵysta bul kórsetkish aımaqtaǵy qaqtyǵys saldarynan 22%-ǵa tómendedi.
UN Tourism qaqtyǵys saldarynan týyndaǵan áýe qatynasyndaǵy úzilister birtindep azaıyp kele jatqanyn atap ótedi. Jaǵdaı ásirese Taıaý Shyǵysta mamyr men maýsym aıynyń basynda aıtarlyqtaı jaqsarǵan, atystyń toqtaýy birqatar áýe baǵdarynyń qaıta jandanýyna múmkindik berdi. Degenmen, tutynýshy kóńil kúıiniń qalpyna kelýi barlyq elde birkelki emes.
Týrızm sarapshylary júrgizgen sońǵy saýalnamaǵa sáıkes, 2026 jyly halyqaralyq týrızmniń ósýine kedergi keltiretin negizgi faktorlar — munaı baǵasynyń qubylmaly bolýy, ınflıatsııa sııaqty ekonomıkalyq alǵysharttar jáne kólik, turý shyǵyndarynyń joǵary ekendigi anyqtalǵan.
Degenmen, sarapshylar qyrkúıekten jeltoqsanǵa deıingi kezeńde azdap ósim baıqalatynyn boljap otyr. Saýalnamaǵa qatysqandardyń shamamen 45%-y halyqaralyq týrızm kórsetkishteri 2025 jyldyń sońǵy 4 aıymen jaqsarady dep kútedi, onyń ishinde 4%-y tipti aıtarlyqtaı jaqsaratynyna senim bildirgen. Taǵy 34%-y kórsetkishterdiń ózgerissiz qalatynyn boljasa, 21%-y nasharlaıdy degen oıda.
Sońǵy derekterdi jáne áli kúnge jalǵasyp otyrǵan geosaıası turaqsyzdyqty eskere otyryp, UN Tourism 2026 jylǵa arnalǵan halyqaralyq týrıstik saparlardyń ósýine qaıta boljam jasady. Qańtar aıyndaǵy esepte 4% ósim bolady dep boljaǵan Uıym endigi tańda 1-2% ósimnen úmit etedi.
UN Tourism naqty jaǵdaı Taıaý Shyǵystaǵy qaqtyǵystyń uzaqtyǵyna, onyń munaı baǵasy men jalpy ınflıatsııaǵa áserine táýeldi ekenin eskertedi.
Eske sala keteıik, Air Astana Dýbaıǵa reısterdi qaıta bastaýdy josparlap otyr.
Nurlan Tuıaqov
