2026 jyly adam papıllomasy vırýsyna qarsy vaktsına uldarǵa da egiledi

ASTANA. KAZINFORM – Kelesi jyldan bastap Qazaqstanda er balalarǵa adam papıllomasy vırýsyna qarsy vaktsına egý kózdelip otyr. Bul týraly Densaýlyq vıtse-mınıstri Tımýr Sultanǵazıev málim etti.

- Ótken jyly qyz balalarǵa adam papıllomasy vırýsyna (APV) qarsy ekpe egýdi bastadyq. Bul dert óte qaýipti, ıaǵnı jatyr moıny obyry jáne basqa da onkologııalyq aýrýlarǵa ákelýi múmkin.

Qazir Úkimette vaktsınany er balalarǵa da egý máselesi qarastyrylyp jatyr. Aldyn ala jospar boıynsha, shamamen bir jyldan keıin bul jumysty bastaý kózdelip otyr, – dedi Tımýr Sultanǵazıev Senatta ótken baspasóz máslıhatynda. 

Sondaı-aq vıtse-mınıstr adam papıllomasy vırýsyna qarsy ekpe alatyn qyzdardyń jas sanatyn keńeıtý josparda baryn aıtty. Sonymen qatar vedomstvo barlyq nıet bildirýshilerge aqyly vaktsına egý máselesin de qarastyryp jatyr. 

– Bizdiń strategııamyz – qyz balalardy barynsha qamtý. Qyzdardy jáne aldaǵy ýaqytta uldardy da qamtý úshin vaktsınatsııalaý deńgeıin 90 paıyzǵa deıin jetkizý kerek. Jyl sońyna deıin 90 paıyzdyq mejege jetýdi josparlap otyrmyz. Keıin kezeń-kezeńimen ekpe alatyn top qataryn keńeıtemiz, ıaǵnı aldymen qyzdar arasynda, odan keıin el balalarǵa da engizemiz, – deıdi mınıstrdiń orynbasary. 

Buǵan deıin elimizde er balalarǵa adam papıllomasyna vırýsyna qarsy vaktsına egilýi múmkin ekendigi týraly habarlaǵan edik.

Sondaı-aq Májilis depýtaty Ashat Aımaǵambetov adam papıllomasy vırýsyna qarsy vaktsınany uldarǵa da salýdy usyndy.

Eske salaıyq, ótken jyly Úkimet adam papıllomasy vırýsyna qarsy vaktsına satyp alýǵa 9,7 mlrd teńgeden astam qarjy bóldi.