2026 jyly 11 myń shaqyrym jol jóndelip, salynady — Kólik mınıstrligi

ASTANA. KAZINFORM — QR kólik vıtse-mınıstri Maqsat Qalıaqparov 2026 jylǵa arnalǵan josparlar týraly baıandady. Ol bıylǵy jyly iri eldi mekenderdi aınalyp ótetin joldardy salý men rekonstrýktsııalaýǵa erekshe nazar aýdarylatynyn aıtty.

Memleket basshysynyń tapsyrmalaryn júzege asyrý sheńberinde elimizde óńirler arasyndaǵy kólik baılanysyn nyǵaıtýǵa, jol qozǵalysy qaýipsizdigin arttyrýǵa jáne halyqtyń ómir súrý sapasyn jaqsartýǵa baǵyttalǵan avtojol ınfraqurylymyn júıeli damytý jumystary jalǵasady.

2026 jyly bul jumys jol-qurylys jumystarynyń barlyq túrin qamtı otyryp, shamamen 11 myń shaqyrym avtomobıl jolynda júzege asyrylatyn bolady. Jalpy kólemniń 2,3 myń shaqyrymy qurylys jáne rekonstrýktsııalaý jumystaryna, 5 myń shaqyrymy kúrdeli jáne ortasha jóndeýge, al taǵy 4 myń shaqyrymy jergilikti mańyzy bar jol jelisin damytý jobalaryna baǵyttalady.

2026 jyly qurylys pen rekonstrýktsııalaý boıynsha negizgi jobalardyń qatarynda Ulytaý oblysy aýmaǵyndaǵy uzyndyǵy 208 shaqyrym bolatyn Qyzylorda — Jezqazǵan avtojolyndaǵy jumystardy jalǵastyrý, jalpy uzyndyǵy 896 shaqyrymdy quraıtyn «Ortalyq — Batys» jobasyn júzege asyrý, sondaı-aq 232 shaqyrymdy quraıtyn Aqtóbe — Ulǵaısyn, 572 shaqyrymdyq Qaraǵandy — Jezqazǵan jáne ózge de baǵyttar boıynsha jobalar bar.

— 2026 jyly Memleket basshysynyń tapsyrmalary aıasynda birqatar iri jobany júzege asyrý josparlanǵan. Bul bizdiń tranzıttik-kóliktik áleýetimizdi damytýǵa qatysty. Úlken jobalardyń qatarynda: Aqtóbe — Ulǵaısyn, Qaraǵandy — Jezqazǵan, Beıneý — Sekseýil jáne óte mańyzdy basty joba — «Ortalyq-Batys». Búgingi kúni barlyq josparlanǵan is-shara men qajetti tehnıkalyq-ekonomıkalyq negizdemeler alyndy, jumystar shtattyq rejımde júrgizilip jatyr, qajetti qarjy kózdelgen, — dep atap ótti Maqsat Qalıaqparov.

Іri eldi mekenderdi aınalyp ótetin joldardy salý men rekonstrýktsııalaýǵa erekshe nazar aýdarylady. Atap aıtqanda, Saryaǵash, Qyzylorda, Petropavl jáne Rýdnyı qalalarynyń aınalma joldary boıynsha jobalardy júzege asyrý josparlanyp otyr.

Sonymen qatar Rahman qaınarlaryna aparatyn joldy, sondaı-aq Petropavl — Reseı Federatsııasynyń memlekettik shekarasy ýchaskesin qosa alǵanda, týrıstik jáne shekaralyq baǵyttardy damytý jumystary jalǵasady.

Kúrdeli jáne ortasha jóndeý jobalaryn júzege asyrý sheńberinde 2026 jyly Jezqazǵan — Petropavl, Atyraý — Oral, Jańaózen — Kendirli, Muqyr — Qulsary, Makınsk — Aqsý — Torǵaı jáne taǵyda basqa baǵyttarda jol jumystaryn júrgizý josparlanǵan. Jergilikti jol jelisi boıynsha Aqtaý — Fort-Shevchenko, Túrkistan — Sháýildir, Chapaı — Saıqyn jobalaryn júzege asyrý, sondaı-aq Semeı qalasynda avtogýjevtik kópir qurylysyn jalǵastyrý kózdelip otyr.

Sonymen qatar avtojol salasynda zamanaýı tsıfrlyq jáne tehnologııalyq sheshimderdi engizý jumystary júrgiziledi.

Qazir avtomobıl joldarynda 71 avtomattandyrylǵan ólsheý stansasy ornatylǵan, onyń ishinde 38-i respýblıkalyq mańyzy bar joldarda, 33-i jergilikti jol jelisinde ornalasqan. Aldaǵy kezeńde olardyń sanyn 220-ǵa deıin ulǵaıtý josparlanyp otyr.

Avtomattandyrylǵan ólsheý stansalaryn ornatý jáne paıdalaný boıynsha biryńǵaı tehnıkalyq talaptar bekitilip, olar «Ákimshilik óndiristerdiń biryńǵaı tizilimi» (ÁÓBT) protsessıngtik ortalyǵymen ıntegratsııalandy. Sonyń nátıjesinde avtomattandyrylǵan stansalar tirkegen salmaq parametrleriniń buzylýyna qatysty nusqamalar avtomatty rejımde qalyptastyrylady.

— Júzege asyrý bóliginde bizde avtomobıl ótkizý pýnktteri boıynsha jańǵyrtý júrip jatyr. Aýqymdy jumys bastaldy. 2026-2027 jyldar ishinde biz 33 ótkizý pýnktin tolyq jańǵyrtýdy josparlap otyrmyz. 2030 jylǵa qaraı olardyń ótkizý qabiletin 35 mln tonnaǵa deıin ulǵaıtý múmkindigimen rekonstrýktsııany tolyǵymen aıaqtaımyz, — dedi vıtse-mınıstr. 

2026 jyly avtojol salasyndaǵy e-Joldar biryńǵaı tsıfrlyq júıesin iske qosý josparlanǵan. Atalǵan júıeniń negizgi maqsaty — etalondyq derekterdi shoǵyrlandyrý jáne olardyń qoǵamdyq baqylaý úshin ashyqtyǵyn qamtamasyz etý.

— Sondaı-aq bizde avtomobıl joldary bóliginde salany tsıfrlandyrý boıynsha jumystar júrgizilip jatyr. Biz qazir tolyq qalyptastyrǵan «E-Joldar» aqparattyq júıesin júzege asyrýdy josparlap otyrmyz: barlyq qajetti tehnıkalyq tapsyrmalar, sharttar alyndy. Kelesi jyldan bastap toltyrý bastalady, bul qajetti qujattarǵa, tólqujattarǵa, jóndeýaralyq merzimderge jalpy qol jetimdiliktiń tolyq bolýyna, qoǵamdyq baqylaýǵa, barlyǵyna qol jetkizýge múmkindik beredi, — dep atap ótti ol. 

Vıtse-mınıstrdiń aıtýynsha, 2026 jyl aýqymdy ınfraqurylymdyq jobalardy júzege asyrýdy, qoldanystaǵy jol jelisin jańǵyrtýdy jáne zamanaýı tsıfrlyq sheshimderdi engizýdi úılestiretin avtojol salasyn damytýdyń mańyzdy kezeńine aınalady. Jol salý, jóndeý jáne basqarý salalaryndaǵy keshendi tásil avtomobıl joldarynyń sapasy men qaýipsizdigin arttyryp qana qoımaı, óńirlerdiń turaqty damýyna jáne elimizdiń kólik ınfraqurylymyn nyǵaıtýǵa baǵyttalǵan uzaqmerzimdi áleýmettik-ekonomıkalyq nátıjelerge qol jetkizýge múmkindik beredi.

— Kelesi jylǵa aýqymdy jumys josparlanǵan, Memleket basshysy qoıǵan barlyq mindet pen maqsat merziminde jáne tolyq oryndalatyn bolady, — dep qorytyndylady Maqsat Qalıaqparov.

Budan buryn BQO-da respýblıkalyq jol qurylysyndaǵy jumystar aıaqtalmaı qalǵanyn jazǵanbyz.