2026 jyly 109 shaqyrym ózen arnasy kúsheıtiledi
ASTANA. KAZINFORM — 2026 jyly 109 shaqyrym ózen arnasy kúsheıtiledi. Bul týraly Sý resýrstary jáne ırrıgatsııa mınıstrligi Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov aıtty.
— 2025 jyly sý tasqyny kezeńi aldynda «Qazgıdromet» RMK deregine sáıkes, jalpy aǵyn 14-20 mlrd tekshe metr shamasynda boljandy. Osyǵan oraı tasqyn sýdy qabyldaý jáne qaýipsiz bosatý maqsatynda aldyn ala sý qoımalarda qajetti bos kólemder komıtet tarapynan qamtamasyz etildi. Sý tasý kezeńinde naqty aǵyn kólemi 16,7 mlrd tekshe metrdi qurady. Budan basqa, sý tasqyny kezeńinde aǵyndy sýlardy modeldeý jáne sý basý qaýpin baǵalaý maqsatynda ortalyq, soltústik jáne batys óńirdegi ózenderdiń basym ýchaskelerinde ózenderdiń jaıylma bóligine batımetrııalyq túsirilimder júrgizilip, olardyń nátıjeleri «Tasqyn» aqparattyq júıesine engizildi, - dedi ol Ortalyq kommýnıkatsııalar qyzmetindegi brıfıngide.
Onyń atap ótýinshe, 2025 jylǵy sý tasqyny kezeńi aldyn ala daıyndyqtyń, sý qoımalarynyń bos syıymdylyǵynyń ulǵaıýynyń jáne ınfraqurylymdy jańǵyrtýdyń arqasynda turaqty ótti dep sanaýǵa bolady.
— Budan bólek, ákimdiktermen birlesip, eldi mekenderge jaqyn ózenderdiń sý tasqyny qaýpi bar ýchaskelerin kúsheıtý jónindegi 2025-2027 jyldarǵa arnalǵan jol karta qabyldandy. Atap aıtqanda, 10 oblysta 51 ózen ýchaskesi men 1 kólde sanatsııa jasaý qajettiligi belgilendi. Onda birinshi kezekte jalpy uzyndyǵy 814,06 shaqyrym ózenderdi kúsheıtý qarastyrylǵan. Oryndalǵan jáne josparlanǵan is-sharalardy eskere otyryp, 2026 jylǵy sý tasqyny kezeńine deıin 109,48 shaqyrym ózen arnasyn kúsheıtý jumystary aıaqtalady dep josparlanýda, - dedi Seıilbek Nurymbetov.
Eske salsaq, budan buryn memleket ózenderdi tartylýdan qalaı qorǵaıtyny týraly jazǵanbyz.