2026 jylǵy jalaqy: qaı mamandyq ıeleri qansha alady
ASTANA. KAZINFORM — 2026 jylǵy sáýirde Ulttyq statıstıka bıýrosy qyzmetkerlerdiń eseptelgen jalaqy mólsheri boıynsha bólinisine jyl saıynǵy zertteý júrgizdi.
Zertteýge sáýir aıynda tolyq jumys istegen qyzmetkerler qamtyldy. Derekterge qosymsha aqylar, ústemeaqylar, syıaqylar, salyqtar jáne zeınetaqy aýdarymdary kiredi.
Іriktemeli zertteý qorytyndysy boıynsha uıymdar men kásiporyndardaǵy qyzmetkerler sany 3 378,6 myń adam. Onyń ishinde erlerdiń úlesi — 48,1% (1 626,4 myń adam), al áıelder — 51,9% (1 752,2 myń adam).
2026 jyly qyzmetkerlerdiń jalaqy mólsheri boıynsha bólinisinde joǵary jalaqy sanattaryna aýysý úrdisi jalǵasty.
Jalaqysy:
— 100 myń teńgege deıingi qyzmetkerlerdiń úlesi 3,3%-dan 2,3%-ǵa deıin tómendedi (-1,0 p. t.);
— 100 myńnan 300 myń teńgege deıingi qyzmetkerlerdiń úlesi 43,0%-dan 39,3%-ǵa deıin tómendedi (-3,7 p. t.);
— 300 myń teńgeden joǵary jalaqy alatyn qyzmetkerlerdiń úlesi 53,7%-dan 58,4%-ǵa deıin ósti (+4,7 p. t.).
2026 jylǵy zertteý qorytyndysy boıynsha birqatar kásipter toptarynda ortasha aılyq ataýly jalaqy mólsheri ósti. 2025 jylmen salystyrǵanda jalaqynyń eń joǵary ósimi ónerkásip, qurylys, kólik jáne basqa da sabaqtas kásipterdiń jumysshylarynda (13,1%), sondaı-aq óndiristik jabdyq operatorlary, qurastyrýshylar men júrgizýshilerde (10,4%) tirkeldi.
Óndiris, kólik, aýyl sharýashylyǵy jáne qyzmet kórsetý salalarynyń qyzmetkerlerin qosa alǵanda, barlyq kásiptik topta ataýly jalaqynyń oń dınamıkasy baıqaldy.
Jekelegen kásipter men laýazymdar boıynsha jalaqy
2026 jyly qyzmetkerlerdiń ortasha aılyq eseptelgen jalaqysy atqaratyn kásibi men laýazymyna qaraı erekshelendi. Uıym basshylarynyń ortasha aılyq jalaqysy 1 101,1 myń teńge.
— Injenerlik-tehnıkalyq mamandar arasynda ınjenerlerdiń jalaqysy 702,0 myń teńge, eńbek qaýipsizdigi jáne eńbekti qorǵaý jónindegi ınjenerlerdiń jalaqysy 645,0 myń teńge, ınjener-tehnologtardyń jalaqysy 617,0 myń teńge, ınjener-energetıkterdiń jalaqysy 615,1 myń teńge, al tehnıkterdiń jalaqysy 314,7 myń teńge.
Densaýlyq saqtaý salasynda dárigerlerdiń ortasha aılyq jalaqysy 491,4 myń teńge, farmatsevterdiń jalaqysy 347,7 myń teńge, feldsherlerdiń jalaqysy 313,6 myń teńge, meıirgerlerdiń jalaqysy 264,6 myń teńge.
Basqa kásipter arasynda býhgalterlerdiń ortasha aılyq jalaqysy 398,6 myń teńge, avtomobıl júrgizýshileriniń jalaqysy 328,1 myń teńge, aspazdardyń jalaqysy 192,6 myń teńge, kúzetshilerdiń jalaqysy 174,2 myń teńge, — delingen Ulttyq statıstıka habarlamasynda.
Aıta ketelik eń tómengi jalaqy qashan kóteriletini týraly jazǵan edik.
