2026 jylǵy jaǵajaıdaǵy Azııa oıyndary: qazaqstandyq júzgishterdiń nátıjesi
ASTANA. KAZINFORM – Qazaqstan erler quramasy Qytaıdyń Sanıa qalasynda ótip jatqan 2026 jylǵy jaǵajaıdaǵy Azııa oıyndarynda ashyq sýda júzýden 5 shaqyrymdyq fınaldyq saıysqa qatysty.
Bul saıysta el namysyn Lev Cherepanov pen Ǵalymjan Balabek qorǵady. QR UOK málimetinshe, jarys qorytyndysy boıynsha Cherepanov úzdik ondyqqa enip, 0:56:00 ýaqyt kórsetkishimen segizinshi oryn aldy.
Al Balabek 0:59:49.4 ýaqyt nátıjesin tirkep, 13-orynǵa turaqtady.
Altyn medaldi qytaılyq Tszyıan Chjan (0:53:46) jeńip aldy. Ekinshi oryndy vetnamdyq Hoan Hýeı Ngýen (0:53:53.2) ıelense, qola júlde Týan An Tran Maıǵa (Vetnam) buıyrdy - 0:53:56.3.
Jarysqa barlyǵy 28 sportshy qatysty.
Aıta keteıik, Qazaqstannyń úsh komandasy 2026 jylǵy Azııa oıyndarynda 1/8 fınalǵa shyqty.
