Bıylǵy tamyz Ózbekstandaǵy eń ystyq aılardyń qataryna endi
ASTANA. KAZINFORM — Ózbekstannyń basym bóliginde bıylǵy tamyz meteorologııalyq baqylaý tarıhyndaǵy eń ystyq aılardyń biri boldy, dep habarlaıdy Kazinform agenttigi.
Ózgıdromettiń málimetinshe, Qashqadarııa jáne Sýrhandarııa oblystarynyń kóp aýdanynda tamyz aıy baqylaý tarıhyndaǵy ystyq úsh tamyzdyń biri boldy.
Eń ystyq kúnderi respýblıkanyń basym bóliginde aýa temperatýrasy 39-41 gradýsqa deıin kóterildi. Tamyz aıy óte ystyq bolǵanymen, temperatýra burynǵy absolıýtti rekordtardan tómen boldy.
Sınoptıkterdiń málimetinshe, Ózbekstanda tamyz aıy óte qurǵaq ótti. Respýblıkanyń basym bóliginde jaýyn-shashyn bolǵan joq, al jaýyn jaýǵan jerlerde onyń mólsheri 0,0-0,4 mm-den aspady.
Ózbekstanda ótken jaz aýa temperatýrasynyń joǵary bolýymen erekshelendi. Maýsymdyq ortasha temperatýra klımattyq normadan 1,2-2,6 gradýsqa joǵary boldy.
Respýblıkanyń basym bóliginde 2026 jyldyń jazy eń ystyq maýsymdardyń reıtınginde ekinshi orynǵa shyqty. Al keı óńirlerde ol Ózbekstandaǵy meteobaqylaý tarıhyndaǵy eń jyly jaz retinde tirkeldi.
Buǵan deıin aptap ystyqqa baılanysty Ózbekstannyń eki oblysyndaǵy balabaqshalar ýaqytsha jabylǵany habarlanǵan bolatyn.
Aqzat Jıenalına
