2026 jylǵy sý tasqynyna qatysty boljamdar dál boldy — vıtse-mınıstr Aslan Abdraımov
ASTANA.KAZINFORM — 2026 jylǵy sý tasqyny kezeńin boljaýda TALSIM jáne Tasqyn júıeleri óz tıimdiligin kórsetti. Bul týraly QR Sý resýrstary jáne ırrıgatsııa vıtse-mınıstri Aslan Abdraımov Ortalyq kommýnıkatsııalar qyzmetinde ótken brıfıngte málimdedi.
Vıtse-mınıstr salany tsıfrlandyrý baǵytynda atqarylyp jatqan jumystarǵa toqtalyp, sý resýrstaryn boljaý isiniń mańyzyna erekshe nazar aýdardy.
— Ózderińiz biletindeı, Tasqyn júıesi sý tasqynyna baılanysty týyndaǵan belgili bir máselelerden keıin paıda boldy. Ol kezde bizde tsıfrlyq sheshimder bolǵan joq. 2025 jyl Tasqyn júıesiniń alǵashqy synaq kezeńi boldy deýge bolady. Sonymen qatar Sý resýrstary mınıstrliginiń alańynda Esil ózeniniń bir basseıni boıynsha TALSIM júıesi de iske qosyldy. 2025 jyly bizdiń júıege de, Tasqyn júıesine de qatysty belgili bir suraqtar boldy. Sizderdiń jáne sarapshylardyń syny eskerildi. Birqatar máselelerdi jetildirýdi talap ettik. Al bıylǵy sý tasqyny kezeńiniń qorytyndysy boıynsha aıtarym, TALSIM platformasy negizgi boljamdyq trendterdiń barlyǵyn durys kórsetti. Osy máselege baılanysty jumys tobynyń otyrystaryn ótkizdik. Keıbir jaǵdaıda sý kóleminiń naqtylyǵynda azdaǵan aýytqýlar boldy, alaıda jalpy úrdis dál keldi. Jalpy, bıyl sý tasqynyn boljaý júıeleriniń jumysy jaqsy deńgeıde atqaryldy dep esepteımin, — dedi Aslan Abdraımov jýrnalısterdiń suraǵyna jaýap bere otyryp.
Spıkerdiń aıtýynsha, bıylǵy sý tasqyny kezeńinde sý sharýashylyǵy nysandarynda eshqandaı tótenshe jaǵdaı tirkelmegen. Sý qoımalarynda apattyq sý jiberý bolǵan joq. Kelip túsken sý kólemi kútilgen deńgeıge sáıkes kelip, barlyq sý tolyqtaı jınaqtalǵan. Sondaı-aq, eldi mekenderdi sý basý jaǵdaılary oryn almaǵan.
Vıtse-mınıstr Qazaqstanda sý tasqynyn boljaýǵa arnalǵan mundaı júıeler alǵash ret qoldanylyp otyrǵanyn atap ótti. Sondyqtan bir-eki jyldyń nátıjesine qarap, bul júıelerdi qatty synǵa alý durys emes ekenin aıtty. Onyń sózinshe, sala mamandary ásirese TALSIM júıesiniń jumysyna oń baǵa berip otyr.
Aıta keteıik, TALSIM jáne Tasqyn júıeleri sý tasqyny táýekelderin basqarýǵa kómektesedi.
