2026 jylǵy shildeden ıpotekanyń jyldyq tıimdi syıaqy mólsheri 20 paıyzǵa deıin tómendeıdi
ASTANA. KAZINFORM – 2026 jylǵy shildeden ıpotekalyq kredıtter boıynsha jyldyq tıimdi syıaqy mólsherlemesi 25-ten 20 paıyzǵa deıin tómendetiledi. Bul týraly Úkimet otyrysynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.
- Tutynýshylyq kredıtteý qarqynyn jáne azamattardyń borysh júktemesin azaıtý úshin, agenttik zańnamalyq jáne retteýshilik sharalar qabyldady. Bankterde jáne mıkroqarjy uıymdarynda kepilsiz tutynýshylyq kredıttiń eń joǵary somasy shekteldi. Bıyl tamyz aıynan bastap retteýshilik deńgeıde 5 jyldan astam merzimge kepilsiz kredıtter berýge tyıym salyndy. Bul shara kirisi tómen qaryz alýshylar kredıt berý merzimin ulǵaıtqan kezde borysh júktemesiniń koeffıtsıentin aınalyp ótýge jol bermeýge baǵyttalǵan. Sondaı-aq úsh jyldan bes jylǵa deıingi qaryzdar boıynsha kapıtalǵa táýekel-saralaý 350 paıyzǵa deıin ulǵaıtyldy, - dedi Mádına Ábilqasymova.
Agenttik basshysynyń aıtýynsha, 2024 jyldan bastap jańa normatıv – qaryz alýshynyń jıyntyq boryshynyń onyń jyldyq kirisine qatynasy engizildi.
- Ótken jylǵy tamyzdan bastap jyldyq tıimdi syıaqy mólsherlemesi shekti mánderi tómendetildi: kepilsiz qaryzdar boıynsha 56-dan 46 paıyzǵa deıin, kepildi qaryzdar boıynsha 40-tan 35 paıyzǵa deıin, ıpotekalyq kredıtter boıynsha 2026 jylǵy shildeden bastap 25-ten 20 paıyzǵa deıin. Budan basqa, retteýshilik deńgeıde borysh júktemesi koeffıtsıentin esepteý qatańdatyldy. Borysh júktemesi koeffıtsıentin esepteý barlyq qaryzdarǵa jáne barlyq qaryz alýshylarǵa qoldanyldy. Budan basqa, qaryz alýshynyń tólemge qabilettiligin baǵalaýǵa qoıylatyn talaptar kúsheıtildi, táýekeli joǵary qaryz alýshylardyń ólshemsharttary engizildi, sondaı-aq bankter úshin defolttyń shekti mánderi belgilendi, - dedi ol.
Aıta keteıik, Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın Úkimettiń ınflıatsııany tejeý sharalaryn atady.