2026 jylǵy Olımpıada: kelisilgen matchtarǵa qarsy bólim quryldy

ASTANA. KAZINFORM – Halyqaralyq Olımpıada komıteti (HOK) 2026 jylǵy qysqy Olımpıada oıyndary kezinde kelisilgen matchtardy boldyrmaý úshin Adaldyqty qamtamasyz etý bóliminiń qurylǵanyn jarııalady, dep habarlaıdy Kazinform.

Uıymnyń resmı saıtyndaǵy aqparatqa sáıkes, «Mılan-Kortına 2026» uıymdastyrý komıtetimen birlesip qurylǵan organ 2026 jyldyń 30 qańtarynan 24 aqpanyna deıin, ıaǵnı Olımpıada aýyldarynyń ashylýynan jabylýyna deıin tolyq jumys isteıdi. Bólim Oıyndar kezinde buzýshylyqtardyń aldyn alý jáne olardy joıý mindetin atqarady. Ol sporttyq tártiptik organdar men quqyq qorǵaý organdary arasynda aqparat almasýdyń jyldam jáne tıimdi bolýyn qamtamasyz etýge arnalǵan.
Bul júıe Londondaǵy jazǵy Olımpıadadan bastap barlyq Oıyndarda sátti qoldanylǵan. 

– Etıkalyq buzýshylyqtar ártúrli formada bolýy múmkin: básekelesterdi manıpýlıatsııalaýdan bastap, akkredıttelgen tulǵalardyń paraqorlyǵyna nemese etıkalyq emes minez-qulqyna deıin. Eger qylmystyq elementter qatysty bolsa, biz barlyq qajetti aqparatty berý úshin Italııa bıligimen, polıtsııamen jáne ádilet organdarymen yntymaqtasamyz, - dep túsindirdi HOK-tyń etıka jáne normalardyń saqtalýy jónindegi bas mamany Djýzeppe Deleonardı. 

Adaldyqty qamtamasyz etý Birlesken bóliminiń negizgi qyzmet baǵyttarynyń biri kelisilgen matchtardyń aldyn alý bolmaq. Organnyń keń halyqaralyq jelisi bar, bul oǵan býkmekerlik keńselerdegi kúdikti áreketterdi, sonyń ishinde akkredıttelgen tulǵalardyń qatysýymen stavkalardy jedel anyqtaýǵa múmkindik beredi. 

Buǵan deıin Rımde 2026 jylǵy Olımpıada oıyndarynyń alaýy jaǵylǵanyn jazǵan bolatynbyz. 

Sondaı-aq 2026 jylǵy Olımpıada oıyndary altyn medaldarynyń quny belgili boldy.